Թեև Վարդան Օսկանյանի նորաստեղծ կուսակցությունը դեռևս հայտարարված է, այսինքն՝ նույնիսկ թղթի վրա էլ կարգին չկա, այդուհանդերձ, արդեն իսկ կա առաջին կուսակցությունը, որը հստակ հայտարարում է Օսկանյանի կուսակցության հետ համագործակցելու մասին: Խոսքը «Հզոր Հայրենիք» կուսակցության մասին է, որի ղեկավար Ստեփան Մարգարյանն ու Վարդան Օսկանյանը արդեն իսկ համագործակցել են ԲՀԿ-ի շրջանակում: Այժմ, փաստորեն, նրանք կհամագործակցեն արդեն Վարդան Օսկանյանի լոկոմոտիվությամբ:
Գրեթե կասկած չկա, որ Վարդան Օսկանյանի շուրջ կհամախմբվեն նաև այլ կուսակցություններ, ինչի շնորհիվ նախկին արտգործնախարարը, ըստ էության, կհավակնի, այսպես ասած, որոշակի համախմբման դիրքերից հանդես գալուն: Մոտավորապես կձևավորվի «Հայկական վերածնունդ» նորաստեղծ կուսակցության նման մի բևեռ, որտեղ, ըստ էության, առանցքային, համեմատաբար հայտնի կամ ուժեղ կուսակցություններ չկան, սակայն կա թվաքանակ, թվաբանություն: Ամենայն հավանականությամբ Վարդան Օսկանյանը կապահովի թվաբանությունը: Սակայն գլխավոր ինտրիգը կմնա, իհարկե, այն, թե Օսկանյանի կուսակցության հանդեպ ինչ դիրքորոշում կունենան ավելի հայտնի քաղաքական ուժերը, հատկապես՝ «Ժառանգությունն» ու ՀԱԿ-ը:
Ինչո՞ւ այդ երկուսը, որովհետև այդ երկու ուժերը մի անգամ արդեն իսկ համախմբվել են Վարդան Օսկանյանի հետ և դուրս մնացել ոչ թե իրենց կամքով, այլ Գագիկ Ծառուկյանի քաղաքականությունից դուրս մնալու հետևանքով: Բայց քաղաքական առանցքային «կապավորը» անկասկած եղել է Վարդան Օսկանյանը, ինչի վառ վկայությունը Լևոն Զուրաբյան-Վարդան Օսկանյան հայտնի ձայնագրությունն էր, որտեղ, ըստ էության, քննարկվում էին քաղաքական մարտավարության հետ կապված հարցեր: Այդ առումով, միանգամայն տրամաբանական է ՀԱԿ-ի ու «Ժառանգության» արձագանքի սպասումը:
«Ժառանգությունն» այսօր «Նոր Հայաստան» միավորման մաս է, սակայն ակնհայտ է, որ այստեղ «Ժառանգությունը» մեծ հեռանկարներ չունի, «Նոր Հայաստանի» թե՛ մեթոդաբանությունը, թե՛ նաև լիդերների կազմը «Ժառանգությանը» գործնականում տեղ չեն թողնում ինքնադրսևորման համար: Հետևաբար՝ չի բացառվում, որ կուսակցությունը, եթե, իհարկե, այդպիսին կա, կքննարկի Վարդան Օսկանյանի նորաստեղծ կուսակցության հետ համագործակցելու և այդ միջոցով քաղաքական արևի տակ սեփական տեղը կամ ավելի շուտ անունը պահելու հնարավորությունը:
Վարդան Օսկանյանին «Ժառանգության» անունն, իհարկե, պետք կլինի: Ավելին՝ Օսկանյանի համար դա կլինի ցանկալի գործակցություն, քանի որ «Ժառանգությունից» մնացել է միայն անունը, և այդպիսով կարիք չի լինի առանձնապես փոխզիջումների գնալ կուսակցության հետ: Այդպիսով, նախկին արտգործնախարարը կարող է իր քաղաքական գործունեության համար բավականին էժան գնով, գործնականում անվճար ձեռք բերել Հայաստանի քաղաքական դաշտում դեռևս կիրառելի կուսակցական բրենդ՝ այդպիսով քիչ թե շատ պոպուլյարիզացնելով իր ստեղծելիք քաղաքական բևեռը:
Բանն այն է, որ Օսկանյանի խնդիրը հենց բևեռ, ոչ թե լոկ կուսակցություն ստեղծելն է: Այդ բևեռի հավանական մասնակից կարող է լինել նաև ՀԱԿ-ը: Իհարկե, այստեղ վիճակը դեռևս շատ հեռու է «Ժառանգությանը» նմանվելուց, բայց գործնականում ՀԱԿ-ն էլ ունի քաղաքական արևի տակ գոնե անունը պահելու անհրաժեշտություն, առավել ևս, երբ պարզ չէ, թե ինչ է մտածում Սերժ Սարգսյանը ՀԱԿ-ին 2017 թվականին խորհրդարան վերցնելու մասով: Իսկ այն, որ առանց իշխանության աջակցության ՀԱԿ-ը չունի խորհրդարանում տեղ վերցնելու, տեղ նվաճելու կենսունակ ռեսուրս, երևի թե կասկածից վեր է: Այնպես որ, ՀԱԿ-ն էլ, մեծ հաշվով, Վարդան Օսկանյանի ստեղծելիք քաղաքական բևեռի համար կլինի համեմատաբար էժան ձեռքբերում:
Հայաստանի քաղաքական դաշտում այլ քիչ թե շատ նշանակալից, հիշվող քաղաքական ապրանքանիշների ակնկալիք նախկին արտգործնախարարի բևեռը երևի թե ունենալ չի կարող: Մեծ հաշվով, Օսկանանին շատ պետք էլ չէ, մեկ-երկուսը բավական է, այն էլ մեկնարկի համար, քանի որ առավել հեռանկարային և ռազմավարական խնդիրները այդ կուսակցության համար ակնհայտորեն կլինեն այնպիսին, որ բացարձակապես չեն ենթադրի որևէ քաղաքական ուժի լուրջ աջակցություն: Վարդան Օսկանյանի գլխավորելիք կամ ձևավորելիք քաղաքական ուժի նպատակն է լինելու դառնալ քաղաքական բևեռ, այսինքն՝ իրականում ոչ թե համախմբել, այլ փոխարինել ներկայումս եղած բևեռներին կամ նոր բևեռի այլ հավակնորդներին՝ նախկինների այլևս անկենսունակության և տապալման ֆոնին:
Հետևաբար՝ Օսկանյանի համար համախմբման գաղափարը ներկայումս ունի տակտիկական, ֆոնային նշանակություն, սեփական դիրքերն ընդգծելու համար: Եվ այդ իմաստով անվանի «ապրանքանիշների» բացակայությունը նրա համար մեծ կորուստ չի էլ լինի, ընդամենը կարող է փոքր-ինչ դանդաղեցնել ընթացքը:
Լուսանկարը՝ Photolure-ի
