Ազգային ժողովի պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանի՝ ՀԱԿ խմբակցության ղեկավար Լևոն Զուրաբյանին ուղղված գրությունը երեկ մերժվեց: Հիշեցնենք, որ Նիկոլ Փաշինյանը Լևոն Զուրաբյանին առաջարկել էր Հրազդանի քաղաքապետի ընտրությունների ժամանակ ՀԱԿ-ին կողմից ընտրատեղամասային ընտրական հանձնաժողովների անդամներ նշանակել Հրազդանի քաղաքապետի թեկնածու Սասուն Միքայելյանի առաջարկած մարդկանց: Նիկոլ Փաշինյանի առաջարկին կողմ էին արտահայտվել ՀԱԿ խմբակցության պատգամավորներ, Լյուդմիլա Սարգսյանը, Հրանտ Բագրատյանը և Ստեփան Դեմիրճյանը:
Նիկոլ Փաշինյանն իր ֆեյսբուքյան էջում այս հարցի վերաբերյալ գրել է. «Ես շարունակում եմ պնդել, որ «Հայ ազգային կոնգրես» խորհրդարանական խմբակցության 7 անդամներից 4-ը կողմ են, որ Հրազդանի քաղաքապետի ընտրությունների տեղամասային ընտրական հանձնաժողովներում նշանակվեն Սասուն Միքայելյանի առաջադրած թեկնածուները: Մինչև այս պահը իմ նշած չորս պատգամավորներից ոչ ոք չի հերքել այդ դիրքորոշումը: Սա դե յուրե բավարար է հարցը լուծելու համար: Եթե ոչ՝ թող հրավիրվի «Հայ ազգային կոնգրես» խմբակցության հատուկ դռնբաց նիստ, քննարկվելու և քվեարկելու համար խնդրո առարկա հարցերը»:
Armtimes.com-ն այսօր Լյուդմիլա Սարգսյանից հետաքրքրվել է՝ արդյո՞ք վերահաստատում է իր դիրքորոշումը:
-Տիկին Սարգսյան, վերահաստատո՞ւմ եք ձեր դիրքորոշումը:
-Ուրեմն պիտի ասեմ՝ երբեք իմ արտահայտած կարծիքներից ես չեմ հրաժարվում, առավել ևս հայտարարություններից: Ես համարում եմ, որ Սասուն Միքայելյանն իրավունք ունի ակնկալելու ՀԱԿ խմբակցության աջակցությունը, որովհետև մենք բոլորս այստեղ ենք (ԱԺ-ում, հեղ.) նաև Սասուն Միքայելյանի ներդրման արդյունքում և կարծում եմ՝ բարոյական կլինի Սասուն Միքայելյանին հանձնաժողովների անդամների հարցում աջակցել, և ես հաստատում եմ, որ ես անձամբ կողմ եմ արտահայտվում այդ աջակցությանը: