«Ինչի՞ եք տալիս մոնոպոլիա, ինչի՞ եք պրոբլեմ ստեղծում»,- ԱԺ այսօրվա նիստում Տնտեսական մրցակցության պաշտպանության պետական հանձնաժողովի ծրագրի քննարկման ժամանակ հարցադրում արեց պատգամավոր Հրանտ Բագրատյանը՝ անդրադառնալով վառելիքի շուկայում ստեղծված իրավիճակին:
Նրա խոսքով՝ գազի ու բենզինի շուկայում այսօր ստեղծված իրավիճակի պատճառը Ռուսաստանի հետ 2013 թվականի դեկտեմբերի 2-ին կնքված պայմանագրերն են: «Այ մարդ, վեր կացեք ասեք՝ բեզնինի գինը թանկ է, որովհետև 2013 թվականի դեկտեմբերի 2-ի պայմանագրով մենք այդ բիզնեսը վստահել ենք ռուսներին, պայմանագիր ենք կնքել ու էդ պայմանագրում չկա կետ, որ նախատեսվում է կապ համաշխարհային գնի հետ»,- նշեց Հ. Բագրատյանը:
Հրանտ Բագրատյանը նաև դիմեց իշխանություններին՝ նշելով, որ շատ ոլորտներում կա մենաշնորհ, և այն, որ ՀՀԿ-ն 70 տոկոս ունի, դա էլ է մենաշնորհ: «Տնտեսական հարցերում մեզանից որակյալ կարծիք չունեք, ուրեմն սխալ եք: Բայց ձեր սխալը առաջ է գնում, մեր ճիշտը հետ է մնում, մեր կարծիքը չի լսվում:
Ժամանակին լավագույնն ենք եղել: 1996 թվականին կրել ենք Ադրբեջանին էլ, Վրաստանին էլ, 1996-97 թվականների բոլոր ցուցանիշներով Անդրկովկասում լավագույնն ենք եղել և պատերազմ ենք հաղթել: Հաղթել ենք, տվել ենք ձեզ պետությունը: Ընտրություն եղավ, մենք թողեցինք գնացինք, արյունահեղություն, արնախումություն չսարքեցինք, թողինք գնացինք: Մի օր դուք էլ կգնաք, ուժով, թե ինքնակամ: Պետք է նորմալ կառավարել, չպետք է կառչել այդ ամենից»,- ասաց Հ. Բագրատյանը:
Մանրամասները՝ տեսանյութում:
