Ամերիկյան կինոակադեմիան, որը շնորհում է «Օսկար» մրցանակը, ազգային փոքրամասնությունների ներկայացուցիչների է ներգրավել ղեկավարության կազմում: Ինչպես հաղորդվում է հաստատության կայքում՝ տնօրենների խորհուրդը համալրվել է 3 անդամով։
Գլխավոր ղեկավար մարմնի կազմում տեղ են զբաղեցրել աֆրոամերիկացի Ռեջինալդ Հադլինը, մեքսիկացիներից և բասկերից սերված Գրեգորի Նավան, ինչպես նաև ծնունդով Հարավային Կորեայից Ջենիֆեր Յու Նելսոնը:
Ավելի վաղ խորհրդի կազմում, որն ընդգրկում է կինոարվեստի 51 գործչի, կար միայն երկու սևամորթ անդամ՝ Կինոակադեմիայի նախագահ Շերիլ Բուն Այզեքսը և կինեմատոգրաֆիստների գիլդիայի կառավարիչ Դերին Օկադան:
«Ես հպարտանում եմ այն քայլերով, որոնք կատարել ենք բազմազանությունը մեծացնելու համար»,-հայտարարել է Այզեքսը:
Տարբեր էթնիկ ծագում ունեցող ևս յոթ մարդ ընդգրկվել է ակադեմիայի պրոֆիլային կոմիտեներում:
Կինոակադեմիայի անդամների կազմը փոփոխելու անհրաժեշտության մասին Այզեքսը հայտարարել էր հունվարի 18-ին: Պատճառ էր դարձել «Օսկար» մրցանակի առաջադրման շուրջ ծագած սկանդալը, երբ կինոակադեմիայում մատնանշեցին, որ անվանակարգված են միայն սպիտակամորթ դերասաններ:
