Ինտենետում հայտնվել է երկու հրապարակում, որոնք պնդում են, թե Google-ն ու Facebook-ը, յուրաքանչյուրն իր հերթին, քննարկում են օնլայն հաղորդակցության Skype հայտնի ընկերությունը գնելու հնարավորությունը: Այս մասին հաղորդում է Reuters գործակալությունը:
Աղբյուրներից մեկի պնդմամբ` Facebook սոցիալական ցանցը պատրաստվում է ամբողջությամբ գնել Skype-ը` նրա համար առաջարկելով 3-4 մլրդ դոլար (վերջերս բորսա դուրս գալուց հետո Skype-ը զգալիորեն ցածր էր գնահատվել` մոտավորապես 1 մլրդ դոլար): Մյուս աղբյուրը նշում է, որ ընկերությունները պատրաստվում են միավորվել` դարձնելով այն համատեղ ընկերություն:
MIGNews.com կայքը նաև գրում է, որ երկու ընկերությունների էմիսարները վարում են նախնական բանակցություններ: Այստեղ անհրաժեշտ է չմոռանալ նաև, որ Facebook-ն ու Skype-ը համատեղ աշխատանքի փորձ ունեն: Անցյալ տարի Skype-ում հայտնվել է սոցիալական ցանցի հավելվածը, որը թույլ է տալիս օգտատիրոջը Skype-ի միջավայրում շփվել Facebook-ի ընկերների հետ:
