Վերաքննիչ քրեական դատարանի վարույթում է Արմեն և Էդգար Պետրոսյանների գործով բերված վերաքննիչ բողոքների քննությունը:
Գործը քննվել է Արարատի և Վայոց Ձորի մարզերի ընդհանուր իրավասության դատարանում Ռուբիկ Մխիթարյանի նախագահությամբ:
31-ամյա Էդգարին և 25-ամյա Արմենին մեղադրանք էր առաջադրվել խմբի կազմում խուլիգանություն կատարելու համար: Դեպքը տեղի է ունեցել Արտաշատի «TV» ժամանցի ակումբում:
Ըստ դատական ակտի՝ ընդհանուր իրավասության դատարանում Էդգարն իրեն մեղավոր չի ճանաչել: Նա հայտնել է, թե քրոջ ծննդյան օրվա նախօրեին՝ 2013 թվականի դեկտեմբերի 17-ին, երաժշտական կենտրոն վերցնելու համար պատահական տաքսիով Երևանից մեկնել է Արտաշատ:
Ճանապարհին իրեն զանգել է կրտսեր եղբայրը՝ Արմենը, և հայտնել է, թե ընկերուհու հետ գտնվում է ծանոթուհի Մարինեի տանը: Իրեն էլ առաջարկել է այցելել:
Ինքը նույն տաքսիով գնացել է Մարինեի տուն: Տաքսու վարորդն էլ է իր հետ այնտեղ գտնվել: Հաց են կերել: Ինքն ու տաքսու վարորդը ոգելից խմիչք չեն օգտագործել:
Այնուհետև եղբոր առաջարկով գնացել են Արտաշատի «TV» գիշերային սթրիփ ակումբ՝ զվարճանալու:
Ակումբում տեղավորվել են սեղաններից մեկի շուրջ, սուրճ ու գարեջուր են պատվիրել:
Քիչ անց իր հեռախոսին զանգ է եկել, ակումբում աղմուկի պատճառով ինքը դուրս է եկել, որ խոսի: Երբ վերադարձել է, տեսել է, որ իր ընկերախումբը ուրիշ սեղանի շուրջ է նստած:
Տեղափոխության պատճառն ինքը չի պարզել: Երաժշտության ձայնն այնքան բարձր է եղել, որ միայն գոռալով էր հնարավոր որևէ բան խոսել:
Իր սեղանակիցները սկսել են պարել ու զվարճանալ: Տեսագրությունների մեջ երևում է, որ իր սեղանակիցներից որևէ մեկի ձեռքին պարելու ընթացքում գարեջրի շիշ կամ ծխախոտ չի եղել, նրանցից ոչ ոք վիրավորական ժեստ կամ արտառոց շարժում չի արել, չի մերկացել: Ինքը միայնակ նստած է եղել սեղանի շուրջ, տեսել է, որ պարահրապարակում իրարանցում սկսվեց. անվտանգության աշխատողներն ու նրանց ընկերները քաշքշել ու հարվածել են իր եղբորը: Որ եղբորն են խփում, ինքը մի քիչ ուշացումով է նկատել՝ ակումբի թարթող լույսերի պատճառով: Ինքը մոտեցել է, որ կրքերը հանդարտեցնի ու հասկանա, թե եղբորն ինչու են հարվածում:
Բարձր երաժշտության պատճառով ինքը գոռալով է հարցրել, իրեն նույնպես սկսել են հարվածել: Իր մոտ տպավորություն է առաջացել, թե ակումբի անվտանգության աշխատողներն ու նրանց ընկերները իրար հետ մրցել են՝ իրեն հարվածներ հասցնելու քանակով, դրանով նրանք հաճոյացել են միմյանց:
Նրանք ծեծելով իրենց դուրս են բերել ակումբից, գցել են գետնին, երկու խմբով շարունակել են ոտքերով հարվածներ հասցնել իրեն ու եղբորը: Վերջինս նույնիսկ ուշաթափվել է, ու նրան այդ վիճակում ևս շարունակել են հարվածել:
Ինքը, դա նկատելով, մի կերպ դուրս է պրծել, ընկել է եղբոր վրա, իր մարմնով ծածկել է նրան, որ պաշտպանի: Նախկինում դատված լինելու հանգամանքը կաշկանդել է իրեն նույնիսկ ինքնապաշտպանության դիմելու հարցում:
Իրենց ծեծողները հարվածներ են հասցրել նաև տաքսու վարորդին: Իսկ երբ վերջինս ու եղբոր և նրա ընկերուհու հետ նստել է մեքենա ու փորձել է փախչել, հարձակվել են, հարվածներ են հասցրել ու վնասել են նաև տաքսի մեքենան:
Այնուհետև հետապնդել են իրենց տաքսուն, ճանապարհին բռնել են իրենց ու նորից ծեծել են:
Առավոտյան եղբայրը հաղորդում է տվել ոստիկանության բաժնում: Մի քանի ամիս իրենք որևէ տեղեկություն չեն ստացել գործի ընթացքի մասին, չեն պատկերացրել, որ իրենք՝ ծեծի ենթարկվելով հանդերձ, կարող են հայտնվել մեղադրյալի կարգավիճակում:
Ինքն ու եղբայրը մեկնել են Ռուսաստան՝ արտագնա աշխատանքի, բայց որոշ ժամանակ անց իմանալով, որ իրենց նկատմամբ հետախուզում է հայտարարված այս դեպքի հետ կապված, իրենք վերադարձել են Հայաստան ու ներկայացել են կամովին:
Արմեն Պետրոսյանը նույնպես իրեն մեղավոր չի ճանաչել: Նա հայտնել է, թե դեպքի օրն ընկերուհու հետ գտնվել է ծանոթուհի Մարինեի տանը, հաց են կերել, ինքը մեկ-երկու բաժակ ոգելից է օգտագործել: Իր հրավերով Մարինեի տուն են եկել նաև իր եղբայրն ու նրան Արտաշատ բերած տաքսու վարորդը:
Բոլորը միասին գնացել են Արտաշատի «TV» ակումբ՝ զվարճանալու:
Նստել են սեղանի շուրջ, սուրճ ու երեք շիշ գարեջուր են պատվիրել: Եղբայրն ու տաքսու վարորդը ալկոհոլ չեն օգտագործել:
Մարինեի ձեռքը պատահաբար դիպել է գարեջրի շշին, գարեջուրը թափվել է սեղանին ու գետնին: Մարինեն անձեռոցիկներ է լցրել թափված գարեջրի վրա, սրբել է, ապա թաց անձեռոցիկները լցրել է մոխրամանի մեջ:
Տեսնելով, որ մատուցողուհին չի մոտենում՝ Մարինեն կանչել է նրան, որ մոխրամանը փոխի:
Մատուցողուհին հրաժարվել է՝ ասելով. «Դու ո՞վ ես, որ ես քո դեմի մոխրամանը փոխեմ»:
Մարինեն դրանից զայրացել, մոխրամանի պարունակությունը լցրել է հատակին ու ասել է. «Չես փոխում, ուրեմն կավլես»:
Դրա պատճառով վիճաբանություն է առաջացել Մարինեի ու մատուցողուհու միջև: Ինքը փորձել է հանդարտեցնել Մարինեին, իսկ մատուցողուհին գնացել-հետ է եկել, իրենց հաշիվը դրել է սեղանին ու պահանջել է հաշիվը փակել:
Իրենք նոր էին ակումբ եկել, մտադրություն չունեին դուրս գալու, բայց իրավիճակը չսրելու համար ինքը վճարել է:
Մարինեն մատուցողուհու վարքագծից ավելի է վրդովվել, նա նորից վիճել է նրա հետ, ապա գնացել-հետ է եկել ու ասել է, որ իրենց սեղանը փոխում են:
Քիչ անց իրենց են մոտեցել ակումբի անվտանգության աշխատողներ ներկայացած Գարիկն ու Արմենը, Մարինեին հարցրել են՝ ի՞նչ է պատահել:
Մարինեն պատմել է, իրենք տեղափոխվել ու նստել են մի ուրիշ սեղանի մոտ:
Դրանից հետո ինքը, իր ընկերուհին ու Մարինեն ակումբի պարահրապարակում պարել են: Իրենք պարելու ընթացքում որևէ մեկի հետ կոնֆլիկտի մեջ չեն մտել, գարեջրի շշով կամ ծխախոտով չեն պարել, ոչ մի անվայել բան չեն արել:
Երբ ինքը մի պահ դադարեցրել է պարը, մոտեցել է անվտանգության աշխատող Արմենն ու ինչ-որ արտահայտություն է արել, ինքը չի լսել՝ նա ինչ ասաց:
Հանկարծ լրիվ անսպասելիորեն այդ Արմենը երկու ձեռքով իրեն հրել է: Անակնկալի գալով՝ ինքն էլ նրան է հրել: Նա բռնել է իր հագուստից, միասին ընկել են մոտակա բազմոցին: Նա մի քանի անգամ իրեն հարվածել է, գցել է հատակին՝ սեղանի տակ:
Իր ընկերուհին ու մյուսները իրեն ծեծող Արմենին կարողացել են քաշել իր վրայից, ինքը փորձել է ոտքի կանգնել: Մինչ ինքը փորձել է ուշքի գալ կատարվածից, անվտանգության նախկին աշխատող Արմենը նորից հարձակվել է իր վրա, տապալել է գետնին: Բազմաթիվ հարվածներ է ինքը զգացել իր մարմնին:
Շարունակելով իրեն հարվածել՝ քարշ տալով դուրս են բերել ակումբից: Ինքը պահանջել է, որ ասեն, թե ինչու են ծեծում: Նկատել է, որ եղբորն էլ են հարվածելով դուրս բերում:
Իրենց շարունակել են ծեծել դրսում: Իրենք փորձել են դուրս պրծնել, բայց չեն կարողացել: Ինքը կորցրել է գիտակցությունը:
Ուշքի է եկել մեքենայի մեջ: Որպեսզի մայրն իրեն այդ վիճակում չտեսնի, որոշել է գնալ Երևան: Նկատել է, որ իր իրերը՝ մատանին, հեռախոսը և 150 հազար դրամը չկան:
Իրենք այդ պատճառով վերադարձել են ակումբի մոտ: Տեսել են, որ այնտեղ դեռ հավաքված մարդիկ կան: Մեքենայից չեն իջել, լուսամուտից ասել են, որ իր իրերը կորել են: Բայց տեսնելով, որ հավաքվածներն ագրեսիվ կերպով մոտենում են մեքենային, իրենք հեռացել են:
Հետագայում հեռախոսն ու մատանին վերադարձրել են իրեն, իսկ դրամապանակն ու գումարը չեն վերադարձրել:
Մեքենայով հեռանալու ժամանակ իրենց հետապնդել են, փակել են իրենց ճանապարհը, իջեցրել են մեքենայից ու դարձյալ ծեծել են: Ինքը շոկի մեջ է եղել, չի հիշում՝ ինչպես է փախել ու հասել տուն:
Ինքն է ոստիկանությունում հաղորդում տվել: Տևական ժամանակ որևէ տեղեկություն չեն ունեցել, ինքն ու եղբայրը մեկնել են Ռուսաստան: Վերադարձել են՝ իմանալով, որ հետախուզման մեջ են Հայաստանում՝ այս գործի հետ կապված:
Ինքն այդպես էլ չի հասկացել, թե անվտանգության նախկին աշխատող Արմենն ինչու է իր նկատմամբ այդպես ագրեսիվ եղել ու ընկերների հետ այդպես ծեծել իրեն: Հետագայում, երբ այդ Արմենն ու նրա ընկերները դատապարտվել են այս գործով, ինքը հարցրել է իր վրա հարձակվելու, իրեն ու եղբորը ծեծելու պատճառը: Նա, իրեն մեղավոր զգալով, ասել է. «Ախպեր ջան, խմած եմ եղել…»:
Այս գործով նախկինում դատապարտվել են չորս հոգի՝ անվտանգության նախկին աշխատող Արմենն ու երկու երիտասարդներ, ինչպես նաև Մարինեն, ում վիճաբանությունը մատուցողուհու հետ սկիզբ է դրել Պետրոսյան եղբայրների ծեծին:
Դատարանում հետազոտվել է Մարինեի նախաքննական ցուցմունքը, որտեղ նա հայտնել է, թե ինքը նախկինում եղել էր «TV» ակումբում: Այդ ակումբը «նախատեսված էր որպես պարային ու ստրիպ ակումբ, որտեղ հաճախորդները գալիս են պարելու, զվարճանալու համար: Ակումբի կողմից ներքնազգեստներով պարում են աղջիկներ՝ նրանք պարում են հաճախորդների հետ ու զվարճացնում են նրանց…»:
Մարինեն ընդունել է, որ այդ օրը մի քիչ ալկոհոլ էր օգտագործել, ինքը ալկոհոլի ազդեցության տակ դյուրագրգիռ ու շուտ բռնկվող է դառնում:
Մարինեն նաև ասել է. «Ես նույնիսկ խոսքեր չեմ գտնում պարզաբանելու՝ ինչ ասել է՝ անվայել շարժումներով պարել: Չէ՞ որ մենք գնացել էինք պարային ակումբ, որտեղ կիսամերկ աղջիկներ են պարել ակումբի կողմից: Ի՞նչ է նշանակում գիշերային ակումբում անվայել պարել: Ես ընդամենը պարել եմ ակտիվ պարային շարժումներով, չգիտեմ, թե ինչով եմ աչքի ընկել, քանի որ բոլորն էլ նման կերպ էին պարում: Իսկ եթե հաճախորդների ուշադրությունը գրավել եմ, ապա մտածում եմ՝ լավ իմաստով: Եթե ինչ-որ բան այնպես չի եղել, ապա ինչո՞ւ ախրաննիկները ինձ այդ մասին չեն նախազգուշացրել…»:
Ընդհանուր իրավասության դատարանը Պետրոսյան եղբայրների մասով գործը քննելով՝ եկել է եզրակացության, որ նրանց մեղսագրված արարքը գործի նյութերով ապացուցված չէ:
Էդգար և Արմեն Պետրոսյանների նկատմամբ կայացվել է արդարացման դատավճիռ, նրանք ճանաչվել են անպարտ և արդարացվել են հանցակազմի բացակայության հիմքով:
Արդարացման դատավճռի դեմ վերաքննիչ բողոք է բերել մեղադրող դատախազը՝ պահանջելով բեկանել դատավճիռը, գործն ուղարկել ստորադաս դատարան՝ նոր քննության: