ԲՀԿ խմբակցության անդամ Վահան Բաբայանը չի թաքցնում, որ ինքը մտադիր է դուրս գալ ԲՀԿ-ից: Նա կուսակցության նախագահի հետ պայմանավորվածություն է ունեցել, որ դրա մասին կհայտարարի մարտի 8-ի տոներից հետո: Բաբայանը մեկն է, ԲՀԿ խմբակցության անդամ այն պատգամավորներից, ովքեր համարում էին, որ ԲՀԿ-ն պետք է բանակցություններ սկսեր ՀՀԿ-ի հետ իշխանական կոալիցիայում տեղ ունենալու համար: Սակայն ԲՀԿ-ում հաղթեց կուսակցության ղեկավար Նաիրա Զոհրաբյանի դիրքորոշումը, ով համարում է, որ ԲՀԿ-ն առնվազն մինչև հաջորդ խորհրդարանական ընտրություններ պետք է շարունակի հանդես գալ ընդդիմադիր դիրքերից, և կախված ընտրությունների արդյունքներից՝ պետք է որոշի իր տեղը քաղաքական դաշտում:
Վահան Բաբայանը միակը չէ ԲՀԿ-ում, որ մեղադրում է կուսակցության նախագահ Նաիրա Զոհրաբյանին սխալ քաղաքական որոշում կայացնելու համար: Կուսակցության տարածքային կառույցների հետ սշխատանքի գծով պատասխանատու Աբրահամ Մանուկյանը ևս անթաքույց աշխատում է կուսակցության նախագահի դեմ: Նա իր համախոհների հետ ժողովներ է կազմակերպում և հայտարարում, որ Զոհրաբյանը «պաթոլոգիկ ընդդիմադիր է» և կուսակցությունը տանում է կործանման:
Մանուկյանը թեև ընդդիմադիր չէ, բայց ցանկանում էր ԲՀԿ-ում իշխանափոխություն անել և Նաիրա Զոհրաբյանին փոխարինել այլ անձով՝ վստահեցնելով, որ ինքը կուսակցության նախագահի աթոռի վրա աչք չունի, և իր միակ նպատակն այն է, որ կուսակցությունը ղեկավարի մի մարդ, ով կկարողանա լեզու գտնել իշխանությունների հետ և ապահովել ԲՀԿ-ի ապահով ներկայացվածությունը իշխանության համակարգում: Բայց համոզվելով, որ իրեն չի հաջողվում ԲՀԿ-ում իշխանափոխություն անել, որոշել է ԲՀԿ-ից մի մեծ կտոր պոկել: Նա տարբեր առիթներով հայտարարում է, որ դուրս չի գալիս ԲՀԿ-ից միայն այն պատճառով, որովհետև զբաղված է դժգոհներին կազմակերպելով, որպեսզի խմբովի դուրս գան կուսակցությունից:
ԲՀԿ-ն լքողների մտահոգությունը պայմանավորված է այլ հանգամանքով ևս: Նրանք մտածում են, որ ԲՀԿ-ին չի հաջողվելու ընդդիմադիրի կարգավիճակով հայտնվել խորհրդարանում, և եթե իրենք 2017թ. խորհրդարանական ընտրություններից հետո ոչ մի հնարավորություն չունեն կրկին պատգամավոր լինելու, ինչ իմաստ ունի մեկ տարի անիմաստ մնալ ԲՀԿ-ում: Այս մարդիկ իրենց բարձրաձայն արվող վերլուծություններում չեն էլ թաքցնում, որ 2007 և 2012թթ. խորհրդարանական ընտրությունների ժամանակ ԲՀԿ-ն կարողացել է շահել հանրության վստահությունը բացառապես Ծառուկյանի փողի և անձնական ազդեցության շնորհիվ: Ծառուկյանը մինչև ընտրությունները բարեգործության անվան տակ փող էր բաժանում, ընտրությունների ժամանակ փող էր բաժանում և միաժամանակ խոստանում էր, որ ԲՀԿ-ի իշխանության գալու դեպքում մարդկանց կյանքում էական փոփոխություններ կլինեն: Հիմա ԲՀԿ-ն մարդկանց փող չի բաժանում և ընտրությունների ժամանակ էլ դժվար թե բաժանի, հասարակությունն էլ չի հավատում, որ ԲՀԿ-ն կարող է հաղթել ՀՀԿ-ին և իրենց կյանքում ինչ-որ բան փոխել:
Վահան Բաբայանը, թերևս, մտածում է, որ որքան շուտ խզի կապերը ԲՀԿ-ի հետ, այնքան ավելի շուտ կկարողանա նոր հարաբերություններ ստեղծել և նոր կուսակցություն գտնել, որի միջոցով կկարողանա հայտնվել հաջորդ խորհրդարանում: Բաբայանը արդեն 7 կուսակցության անդամ է եղել՝ «Հանրապետության», «Նոր ժամանակների», ՔԴՄ, Երիտասարդական կուսակցության, ՄԻԱԿ-ի, Հայաստանի առաջադիմական կուսակցության և ԲՀԿ-ի: Ըստ որոշ տեղեկությունների՝ Բաբայանը կարող է անդամագրվել Արա Աբրահամյանի կողմից ստեղծվելիք կուսակցությանը, իսկ եթե Աբրահամյանը կուսակցություն չստեղծի, կարող է փորձել գտնել այլ գործընկերներ: Բաբայանը դեմ չի լինի, եթե իրեն պաշտոն տային պետական կառավարման համակարգում, և ինքը անհատապես մաս կազմեր իշխանական կոալիցիային: Չնայած չի բացառվում, որ նա փորձի իր տեղը գտնել պետական կառավարման համակարգում:
Աբրահամ Մանուկյանը ևս ԲՀԿ-ի հետ այլևս քաղաքական ապագա չի տեսնում: Մանուկյանը հասկանում է, որ առավելագույնը, ինչ կարելի էր ստանալ ԲՀԿ-ից՝ այն կլիներ, եթե այս մեկ տարին ԲՀԿ-ն միանար իշխանական կոալիցիային, և ինքը դրանից ինչ-որ օգուտ ստանար: Նա համոզված է, որ մեկ տարի հետո ԲՀԿ-ն գնալու է պատմության գիրկը, իսկ ինքը որպես ավելի հաշվենկատ գործիչ պետք է փորձի ամեն ինչ անել, որ ավելի շուտ հրաժեշտ տա այդ կուսակցությանը:
Չնայած դրան ԲՀԿ-ում բոլորը չէ, որ այդպես են հաշվում: ԲՀԿ-ականների ճնշող մեծամասնությունը հասկանում է, որ խորհրդարանում տեղերի պակասելու արդյունքում այլ կուսակցություններում ներքին մրցակցությունը այնքան է մեծացել, որ իրենք չեն կարողանալու որևէ այլ կուսակցությունում տեղավորվել: Քաղաքական արևի տակ տեղը պահելու միակ ձևը ԲՀԿ-ում մնալն ու պայքարելն է: Եթե անգամ հաջողության հասնելու հավանականությունը այս դեպքում փոքր է, սակայն այնուամենայնիվ կա: Մինչդեռ ԲՀԿ-ից դուրս գալու դեպքում քաղաքական թոշակառուի կարգավիճակը երաշխավորված է:
