Վերջերս «Առաջին լրատվական»-ը անդրադարձել էր Հայաստանում գործող «Հարավկովկասյան երկաթուղիների» վիճակին, մասնավորապես այն խնդրին, թե ինչպես են ընկերության ներդրումային միջոցները, որոնք պետք է ուղղվեն ընկերության ենթակառուցվածքների բարելավմանը, յուրացվում։
Մենք անդրադարձել էինք տարիներ առաջ ընկերության անվան ռեբրեդինգի պատմությանը, որի համար շուրջ 120 հազար ԱՄՆ դոլար էր յուրացվել։ Մասնավորապես, տարիներ առաջ նախատեսված էր «Հարավկովկասյան երկաթուղիներ» ընկերության անվան մեջ փոփոխություն կատարել և պարտադիր ներդնել Հայաստան բառը։ Դրա հետ կապված, անգամ 2010 թվականին ընկերության ղեկավարների՝ դեռևս նախկին տնօրեն Սերգեյ Շայդուլինի օրոք ասուլիս հրավիրվեց, հայտարարվեց, որ ընկերությունում սկսվելու է ռեբրենդինգ, որի շրջանակում մշակվելու է ընկերության նոր բրենդի անունը։ Ռեբրենդինգի հիմնական նպատակը Հայաստանի առաջատար տրանսպորտային ընկերության ազգային բրենդ ստեղծելն էր, և ընկերությունը պետք է դառնար ազգային փոխադրող։ Այդ նպատակով վարձակալվել էր մոսկովյան հեղինակավոր բրենդինգային ընկերություն, որին վճարվել էր մոտ 120 հազար ԱՄՆ դոլար։ Մասնավորապես, նախկին տնօրեն Շայդուլինը համարում էր, որ ռեբրենդինգը կնպաստի հայկական երկաթուղիների ինտեգրմանը միջազգային կառույցներին։
Բրենդինգային ընկերությունը որոշակի աշխատանք կատարել էր բրենդի ստեղծման գործում և մնում էր ներդնել այդ բրենդը։ Սակայն այդ ժամանակահատվածը համընկավ Սերգեյ Շայդուլինին Վիկտոր Ռեբեցով փոխարինելու հետ։ Արդյունքում այդ նախագիծը, որի վրա ընկերության ներդրումային միջոցներից ծախսվել էր 120 հազար ԱՄՆ դոլար, որն իրականում պետք է ուղղվեր ընկերության ենթակառուցվածքների վերազինմանը, մոռացվեց։ Եվ սա այն դեպքում, երբ ազգային բրենդ, ազգային տարրերով բրենդ ստեղծելու և կիրառելու վերաբերյալ կար «Հարավկովկասյան երկաթուղիների» տնօրենների խորհրդի հանձնարարականը, սակայն Վիկտոր Ռեբեցը անձնական դրդապատճառներով անտեսեց այն և այդպես էլ որևէ բացատրություն չներկայացրեց, թե ինչու փոշիացվեց 120 հազար դոլարը։
«Առաջին լրատվական»-ի տեղեկություններով՝ մեր այս հրապարակումից հետո իրավապահ մարմինները՝ ոստիկանությունը, ակտիվորեն սկսել են հետաքրքրվել ընկերության ֆինանսական հոսքերով և մոտ 10 օր առաջ ընկերությունում ստուգումներ էին իրականացվում։ Առաջիկայում պարզ կլինեն ստուգումների արդյունքները, որոնք, ըստ նախնական տեղեկությունների, այնքան էլ մխիթարական չեն տնօրինության համար։
«Հարավկովկասյան երկաթուղիներ» ընկերության խոսնակ Վարդան Ալոյանը, սակայն, «Առաջին լրատվական»-ի հետ զրույցում խնդրի վերաբերյալ նախ ասաց, որ «ստուգումների մասին առաջին անգամ մեզանից է լսում», ապա մեր ճշտող հարցին՝ թե այսինքն հերքո՞ւմ է, որ ընկերությունում ստուգումներ են ֆինանսական հոսքերի հետ կապված, խոսնակը պատասխանեց. «Ես չեմ հերքում, պարզապես ես ինֆորմացիա չունեմ»: Ապա խոսնակը խոստացավ աշխատանքային օրերին հավելյալ տեղեկություններ տրամադրել։
