ՀՀ պաշտպանության նախարար Սեյրան Օհանյանը լրագրողների հետ զրույցում նշեց, որ զինված ուժերի հետ այսօր խորհրդակցություն է անցկացրել հենց Նոյեմբերյանի զորամասի դեպքի կապակցությամբ: Նա նշեց, որ ոչ ոք անպատիժ չի մնալու, որ զինծառայողի հիշատակը իրենք միշտ էլ վառ են պահում, և հավելեց, որ բոլոր մեղավորները պատժվելու են, իրենց տույժը ստանալու են:
Սպանված զինծառայող Լյուքս Ստեփանյանի հայրը հարց ուղղեց նախարարին, թե ինչու է ինքը որդու սպանության մասին այդքան ուշ տեղեկացվել, երբ դեպքը տեղի է ունեցել 15.00-ին, իսկ ինքը դեպքի մասին իմանում է 23.00-ին: Նախարարը նշեց, որ մի քանի ժամերի ընթացքում պետք է տեղեկացնեն:
«Առաջին լրատվական»-ի այն դիտարկմանը, որ բանակում կատարված հանցագործությունների համար հրամանատարները, զինված ուժերի սպայական կազմը լավագույն դեպքում ստանում են կարգապահական տույժ կամ հայտնվում են կադրերի ռեզերվում, նախարարը չհամաձայնեց: Բարեկամների պնդմանը, թե տվյալ դեպքն ապացուցում է, որ բանակում առկա է անառողջ մթնոլորտ, և այդ սպանությունը առաջին դեպքը չէ, նախարարը նշեց, որ կոնկրետ այդ զորամասում առաջինն է:
Հարևանները պատմեցին, որ Լյուքսը համեստ և խելացի տղա էր, նա որևէ անգամ ծառայությունից չի խուսափել:
Սեյրան Օհանյանը նաև ներկայացրեց, թե ինչպես է տեղի ունեցել ողբերգությունը Նոյեմբերյանի զորամասում. «Դեպքը տեղի է ունեցել բանակային ծառայության ժամանակ միջանձնային հարաբերությունների խախտման արդյունքում առաջացած վեճի պատճառով՝ պահակային արթուն հերթափոխում գտնվող զինվորների և պահակակետի դիմաց կանգնած ժամապահի միջև, որի արդյունքում, նախնական տվյալներով, զենքի օգտագործմամբ Լյուքս Ստեփանյանին միտումնավոր հասցվել է մահացու վիրավորում, իսկ զինծառայողներից մեկն էլ գտնվում է ծայրահեղ ծանր վիճակում»:
Պնախարարը խոստացավ, որ որևէ մեկն անպատիժ չի մնալու՝ անկախ նրանից, թե ով կլինի զինվորը, որը հանցանք է կատարել: Մեր իշխանությունը, զինվորական դատախազությունը, ՊՆ-ն գործը հասցնելու են մինչև վերջ: Դիտարկմանը, թե բանակում ամենաթողություն է տիրում, և գրեթե ամեն օր զինվոր է սպանվում կամ ինքնասպան լինում, նախարարը նշեց, որ չի կարելի ամենաթողություն անվանել, սակայն տվյալ պարագայում տվյալ զորամասում, իհարկե, բացթողում է եղել, բայց ասել, որ ամենաթողություն է, նախարարը համաձայն չէ, քանի որ բանակը այսօր խնդիր է կատարում, մարտական խնդիր, նա նաև նշեց, որ կան նաև զորամասեր, որտեղ հրամանատարական կազմի ցածր մանկավարժական պատրաստվածություն կա, այսինքն՝ դաստիարակչական խնդիրը գտնվում է որոշակի ցածր մակարդակում:
Դիտարկմանն էլ, թե համանման դեպքերում ժողովրդավարական երկրում նախարարը հրաժարական կտա, նախարարը պատասխանեց. «Ճիշտ չեք, յուրաքանչյուր դեպքի կապակցությամբ մենք ծառայողական քննություններ ենք անցկացնում, ինչպես նաև համապատասխան դաստիարակչական միջոցառումներ ենք իրականացնում հատկապես կարգապահական ուղղությամբ, իսկ ես պատասխան եմ տալիս ինձ համար և որոշակի չափով իրավապահ մարմինների համար»:
