Սերժ Ավետիքյանի «Անուշ» մյուզիքլի պրեմիերայից հետո քննադատության մեծ ալիք բարձրացավ: Օրերս մտավորականներն անգամ նամակ գրեցին Սերժ Սարգսյանին՝ քննադատելով և դեմ արտահայտվելով բեմադրությանը և խնդրելով, որ Սերժ Սարգսյանը թույլ չտա այն դուրս բերել միջազգային ասպարեզ:
Դերասան Սերգեյ Դանիելյանը թեև մյուզիքլը չի տեսել, սակայն, ըստ նրա՝ եթե անգամ սա աշխարհի ամենաապաշնորհ ներկայացումն է, միևնույն է՝ անընդունելի է նամակ գրելու և նախագահին դիմելու երևույթը՝ մի ժամանակ սերիալների, հիմա էլ այս ներկայացման համար:
Ըստ Սերգեյ Դանիելյանի` մտավորականները ոչ թե պետք է, ինչպես նախկինում, զանգեին կոմկուսին, այլ եթե կարող են, թող իրենք ստեղծեն:
«Հասկանում եմ, որ ՀՀ նախագահը մտավորականների արվեստի ընկալման չափանիշն է, նա մաեստրոն է, բայց արդյոք նրան պե՞տք է անընդհատ անհանգստացնել:
Վերջապես պետք է հասկանալ, որ նամակներ գրելու ժամանակներն անցել են»,- ասաց դերասանը:
Ըստ նրա` իրենք «Պրավդային» են նամակ գրել: Նրա համար զարմանալի է, որ տեղն եկած ժամանակ արվեստագետները սկսում են նախագահի լեգիտիմության հարցը որոշել, բայց նեղն ընկած տեղը նամակ են գրում նախագահին: «Ինչի՞ համար անընդհատ գրել նախագահին»,- ասաց դերասանը` հավելելով, որ ամոթ է:
«Հայաստանը պետք է ներկայանա, դուրս գա: Ասում են՝ չի կարելի, որ Հայաստանի մշակույթը այդ բեմադրությամբ ներկայանա. եղբայր, արեք դրանից լավը, մինչև հիմա ե՞րբ եք դուք ներկայացրել, ի՞նչ եք արել:
Անուշը պետք է լինի տրեխներո՞վ, վրայից թրիքի հո՞տ պետք է գա: Լավն է, բայց ուրիշ մոտեցումներ էլ կան, եղբայր»,- ասաց Սերգեյ Դանիելյանը:
«Մառազմը խփել է նրանց,- ասաց դերասանը:-Մտավորականներին պատկերացնում եմ այսպես` հրաժարվեն կոչումներից հանուն արվեստի»,- ասաց նա:
Հարցին՝ այս երկրում մեկ հոգի՞ է որոշում, թե ով ինչ խաղա, ով ինչ ղեկավարի, դերասանը նշեց՝ քսան և ավելի տարիներ շարունակ ինքն ինչ ուզել՝ խաղացել է, արել է այն, ինչ ուզել է:
