Ուրախ եմ, որ լեգենդար մարզիկ Յուրի Վարդանյանը նշանակվեց սպորտի նախարար: Այսօր «Առաջին լրատվական»-ի հետ զրույցում ասաց ՀՀԿ խմբակցության պատգամավոր, խորհրդարանում սպորտային ձախողումների մասին բարձրաձայնած Լևոն Մարտիրոսյանը՝ պատասխանելով հարցին, թե ինչ է պետք սպորտի ոլորտի ապաքաղաքականացման և ոլորտի խնդիրների վերացման համար:
«Ուզում եմ ևս մեկ անգամ ասել, որ ես նախկինում որևէ մեկի հրաժարականի հարցը չեմ բարձրացրել, ես ուղղակի հարց եմ ուղղել կառավարությանը սպորտին, օլիմպիական խաղերին մեր հավաքականի ելույթին գնահատական տալու վերաբերյալ: Որևէ մեկի հրաժարականը չեմ պահանջել, մանավանդ` Օլիմպիական կոմիտեի նախագահի: Ես ուրախ եմ, որ լեգենդար մարզիկ Յուրի Վարդանյանը նշանակվեց սպորտի նախարար»,- ասաց նա: Վերջինիս կարծիքով՝ լավ մարզիկ լինելը լավ նախարարի գրավական չէ, բայց նա հուսով է, որ Յուրի Վարդանյանը լավ նախարար կլինի:
Հիշեցնենք, որ ԱԺ ՀՀԿ խմբակցության պատգամավոր, ՄԻԱԿ անդամ Լևոն Մարտիրոսյանը ԱԺ-կառավարություն հարցուպատասխանի ժամանակ հարց էր ուղղել սպորտի սառեցված ԲՀԿ-ական նախարար Հրաչյա Ռոստոմյանին և Լոնդոն-2012 օլիմպիական խաղերում հայ մարզիկների խաղերը խայտառակ որակել: «Այս պատմությունն ինձ հիշեցնում է Լենին պապիկի թաղման հետ կապված հայտնի անեկդոտը` թաղեցին Լենին պապիկին, սակայն եկան տուն, ու պարզվեց, որ Լենինը կենդանիներից ամենակենդանին է»,- ասել էր պատգամավորը:
