Ղարաբաղյան հակամարտության գոտում իրադրությունը խիստ դժվարին է», – նախօրեին Վաշինգտոնում հայտարարել է Ուկրաինայի արտգործնախարար, ԵԱՀԿ-ում նախագահող Լեոնիդ Կոժարան, ով հաշվետվություն է ներկայացրել Կոնգրեսի Հելսինկիի հանձնաժողովին` պաշտոնական Կիևի առաջնահերթությունների ու առաջիկա անելիքների վերաբերյալ:
Ելույթ ունենալով ամերիկացի հեղինակավոր փորձագետների ու կոնգրեսականների առջև՝ Կոժարան փաստել է, որ նախագահությունը ստանձելու առաջին իսկ օրից ինքը որոշակի քայլեր է ձեռնարկել Մերձդնեստրի հակամարտությունը կարգավորելու ուղղությամբ և հանգել որոշակի արդյունքների: Ղարաբաղյան հարցում, սակայն, իրավիճակը բավական բարդ է՝ խոստովանել է Ուկրաինայի արտգործնախարարը:
«Իրադրությունը ծայրահեղ դժվարին է, մենք տեսնում ենք, որ լարվածությունը աճում է՝ երկու կողմերից արվող քաղաքական հայտարարությունների պատճառով: Թե՛ Հայաստանը, թե՛ Ադրբեջանը բարեկամ երկրներ են Ուկրաինայի համար, այդ պատճառով մենք չենք կարող կողմերից որևէ մեկին աջակցել, սակայն կարծում եմ, որ պատերազմին հաջորդած տասնամյակի ընթացքում հավասարակշռության որոշակի լծակներ են ստեղծվել, և իմ խնդիրն է` որպես նախագահող, ոչ թե թուլացնել այդ լծակները, այլ առաջ տանել բանակցությունները», – ասել է Կոժարան:
Հատկանշական է, որ հանձնաժողովի անդամների կողմից ԵԱՀԿ-ի նախագահողին ուղղված առաջին հարցը ևս վերաբերում էր ղարաբաղյան հակամարտությանը: «Թե՛ Հայաստանը, թե՛ Ադրբեջանն այժմ հզորացնում են իրենց ռազմական ներուժը, և մեզնից շատերն են մտահոգված՝ ինչի կարող է ի վերջո այս ամենը հանգեցնել», – հարցրեց Հելսինկիի հանձնաժողովի համանախագահ, կոնգրեսական Քրիսթոֆ Սմիթը:
Կիսելով վերջինիս մտահոգությունը՝ Լեոնիդ Կոժարան տեղեկացրեց, որ խնդրի կարգավորմանը նպաստելու նպատակով մտադիր է հունիսի երկրորդ կեսին մեկնել Հարավային Կովկաս:
«Հունիսի 17-20-ը կատարելիք այդ այցի ընթացքում ես մտադիր եմ ընդգծել հրադադարի ռեժիմը խստորեն պահպանելու անհրաժեշտությունը, ինչպես նաև իմ աջակցությունը հայտնել ԵԱՀԿ-ի Մինսկի խմբի համանախագահներին, որոնք կոչ են անում ակտիվացնել բանակցությունները հիմնարար սկզբունքների շուրջ», – հայտարարեց ԵԱՀԿ-ում նախագահող երկրի արտգործնախարարը:
Հելսինկիի հանձնաժողովից բացի, Լեոնիդ Կոժարան ղարաբաղյան խնդրի շուրջ այս օրերին քննարկումներ է ունեցել նաև ՄԱԿ-ի գլխավոր քարտուղար Բան Կի-մունի հետ՝ կրկին ընդգծելով, որ Ուկրաինան ուզում է նոր թափ հաղորդել սառեցված բանակցություններին:
Ակնկալվում է, որ այսօր էլ ԵԱՀԿ-ում նախագահող երկրի արտգործնախարարը Վաշինգտոնում կհանդիպի ԱՄՆ-ի պետքարտուղար Ջոն Քերրիի հետ:
