Պետական դավաճանության գործով ամբաստանյալի աթոռին հայտնված չորս ամբաստանյալներից երկուսը հայր ու որդի են, իսկ մյուս երկու կանայք՝ ազգականներ։ Նրանց բոլորի դեպքում էլ, ըստ մեղադրանքի, նույն մեխանիզմն է գործել՝ նրանց հետ կապ է հաստատել մի քաղաքացի և որոշակի գումարի դիմաց առաջարկել ինֆորմացիա փոխանցել ադրբեջանական հատուկ ծառայություններին «սկայպի» կամ «օդնոկլասնիկիի» ցանցերի միջոցով։
Ըստ մեղադրանքի՝ 49-ամյա Ռաֆիկ Պապոյանը, բնակվելով Թուրքիայում, հավաքագրվել է այդ երկրի տարածքում գործունեություն ծավալած՝ Ադրբեջանի հետախուզական ծառայությունների աշխատակից հանդիսացող Սեյրան անունով ներկայացած անձի կողմից և կատարել այդ հետախուզական ծառայության առաջադրանքները՝ Հայաստանից Թուրքիա ժամանած ՀՀ քաղաքացիներից ընտրել Ադրբեջանի հետախուզական ծառայությունների համար հետաքրքրություն ներկայացնող անձանց ու հավաքագրման նպատակով ծանոթացրել նրա հետ:
Գրեթե նույն սցենարով գործել են նաև մյուսները։ Դատական նիստի ավարտին ամբաստանյալների հարազատներն ու պաշտպանները խուսափեցին պատասխանել մեր հարցերին, միայն Ռաֆիկ Պապոյանի հարազատները «Առաջին լրատվական»-ի հետ զրույցում բացառեցին նրա մասնակցությունը լրտեսության գործին՝ կարծիք հայտնելով, որ Ռաֆիկը թուրքական և ադրբեջանական հատուկ ծառայությունների թակարդում կարող էր հայտնվել պատահականորեն։
Ռաֆիկի մոր՝ տիկին Ռոզայի խոսքով՝ իր որդին երկու տարի Թուրքիայում շինարարության վրա է աշխատել, բայց առանձնապես գումար չի ուղարկել ընտանիքին, միայն մեկ անգամ մի քաղաքացի է զանգել Ռաֆիկի որդուն և 750 ԱՄՆ դոլար գումար փոխանցել՝ ասելով, թե հայրն է ուղարկել։ Սակայն հիմա մեղադրանքի հիմքում հենց այդ 750 դոլարն է դրված, որի դիմաց հենց Ռաֆիկը ինֆորմացիա է փոխանցել ադրբեջանական հատուկ ծառայություններին։
Նշենք, որ ամբաստանյալներից երեքին՝ Ռաֆիկ Պապոյանին, Կարինե Ղումաշյանին, Սերգեյ Պապոյանին, մեղադրանք է առաջադրվել ՀՀ քրեական օրենսգրքի 299 հոդվածի 1-ին մասով, այն է՝ պետական դավաճանություն, իսկ 18-ամյա Դիանա Գորոյանին, ով Կարինե Ղումաշյանի ազգականն է, ՔՕ 335 հոդվածի 1-ին մասի (հանցագործության մասին չհայտնելը) հատկանիշներով: Վերջինս, սակայն, դատարանում հայտնեց, որ իրեն այս գործի, խմբի գոյության մասին առհասարակ որևէ բան հայտնի չի եղել, որը ինքը կարող էր թաքցնել։
Դատական նիստը հետաձգվեց պաշտպաններից Սուրեն Մնացականյանի միջնորդությամբ: Հաջորդ նիստը նշանակված է փետրվարի 10-ին։
