Վաղը կլրանա Շուշիի ազատագրման 21-ամյակը: Տոնի առթիվ այսօր լրագրողների հետ հանդիպեցին Ազգային Լեգեոն ջոկատի ազատամարտիկ, գեղանկարիչ Մկրտիչ Տոնոյանը, Հատուկ նշանակության ջոկատի հիմնադիր և հրամանատար Վովա Վարդանովը, հոգեբան Կարինե Նալչաջյանը:
Խոսելով հաղթանակի մասին՝ Վովա Վարդանովն ասաց, որ դարերով մշակութային օջախ համարվող Շուշին վերածվել էր հրեշի, որտեղից անընդհատ ռմբակոծվում էին հարակից հայկական գյուղերը. «Շուշին ոչ թե բնակավայր էր, այլ հակառակորդի կրակակետ: Փակված էր հայաբնակ գյուղերի միջև ճանապարհը, Հայաստանի հետ սահմանը հեռացվել էր 40-50 կմ-ով»:
Մկրտիչ Տոնոյանն էլ հավելեց, որ եկել է ժամանակը՝ ազատագրմանն այլ կողմից նայել, քանի որ Շուշին ուներ ոչ միայն ռազմական մեծ նշանակություն, այլև խորհրդանշական: Շուշին ազատագրելով՝ հնարավոր է տեր կանգնել ողջ Արցախին. «Օպերացիայի հաջողությունը նոր ոգևորություն առաջացրեց: Հաղթահարելով ճգնաժամը՝ կարողացանք հաղթել պատերազմում»:
Ինչ վերաբերում է պատերազմում զինվորների հոգեբանությանը, ապա հոգեբան Կարինե Նալչաջյանը հավելեց, որ մարդկանց միջից կոտրվեց այն կարծրատիպը, թե թուրքերը մեզ կուտեն, թուրքից վախենում ենք. «Մեր հերոսները կոտրեցին թուրքի անհաղթահարելի, սարսափելի լինելու մասին կերպարը: Շուշին մեր մեջքն ուղղեց, մենք հսկայական թռիչք ապրեցինք, սակայն պետք է տեր կանգնել հաղթանակին, որպեսզի հոգեբանական ճգնաժամ չունենանք»:
