Nokia ընկերությունը ներկայացրել է Lumia 928 սմարթֆոնը: Windows Phone 8-ի բազայի վրա աշխատող սարքավորման լուսանկարը հայտնվել է Nokia-ի կայքում, Vanity Fair ամսագրում և ԱՄՆ-ում տեղադրված գովազդային վահանակների վրա, գրում է Engadget-ը:
Սարքավորման բնութագիրը չի հրապարակվում, սակայն Nokia-ն Lumia 928-ը ներկայացրել է որպես «տեսախցիկ-հեռախոս», այսինքն՝ որակյալ տեսախցիկով սմաթֆոն: Գովազդում ասվում է, որ «լույսի բացակայության պայմաններում սմարթֆոնների մեջ այն ամենաորակյալ լուսանկարներն է անում»:
Սմարթֆոնի «լուսանկարչական» բաղկացուցիչ մասը Nokia-ի վաղեմի գործընկեր «Կառլ Ցեյս» ընկերության աշխատանքն է:
Lumia 928-ի գովազդային լուսանկարներում այն ներկայացված է որպես սև գույնի սմարթֆոն-մոնոբլոկ: The Next Web-ը ենթադրում է, որ հեռախոսի կմախքը մետաղյա է: Սմարթֆոնի էկրանի չափերը չեն հրապարակվել, էկրանի տակ կառավարման երեք կոճակներ կան՝ «Հետ», «Տուն» և «Որոնում»:
Nokia-ն Windows Phone-ով կառավարվող սմարթֆոններ է թողարկում՝ սկսած 2011թ.: 2013 թ. առաջին եռամսյակում ֆիննական ընկերությունը 5,6 միլիոն Lumia սարքավորումներ է թողարկել:
IDC-ի տվյալներով՝ 2013 թ. հունվար-մարտ ամիսներին Nokia-ն չի ներգրավվել սմարթֆոն արտադրողների առաջին հնգյակի մեջ, սակայն «սովորական» բջջայինների մատակարարմամբ երկրորդ տեղն է զբաղեցրել:
