Եթե կա երկար և առողջ կյանքի սեփական շանսերի բարելավման հասարակ միջոց, ապա դա հեռուստացույցն անջատելն է՝ գրում է The Daily Express-ը: Թերթը հղում է անում բազմաթիվ հետազոտությունների, համաձայն որոնց՝ հեռուստացույցի պատճառած վնասը կարելի է համեմատել ծխելու կամ ճարպակալման հետևանքների հետ:
Մասնավորապես Գլազգոյի համալսարանի տվյալներով՝ երեխաները, որոնք հեռուստացույց են դիտում օրական ավելի քան 2 ժամ, առավել հակված են ասթմայի, քան նրանց հասակակիցները: Ինչպես բացատրում են փորձագետները, այդ երեխաները վարում են առավել քիչ ակտիվ կենսակերպ, ինչն էլ հանգեցնում է այդ հիվանդության:
Թերթը մեջբերում է World Cancer Research Fund-ի նախազգուշացումը, համաձայն որի՝ նույնիսկ եթե երեխաներն ամեն օր զբաղվում են ֆիզիկական վարժություններով, հեռուստացույցի, համակարգչի կամ խաղային ապարատի առջև երկար ժամեր նստելը մեծացնում է մեծ տարիքում քաղցկեղի առաջացման ռիսկը:
Ինչ վերաբերում է մեծահասակներին, ապա շատերը իրենց քնի գրաֆիկը հարմարեցնում են հեռուստահաղորդումներին, այլ ոչ թե կենսաբանական գործոններին: Այս մասին հայտնում են Փենսիլվանիայի համալսարանի գիտնականները: Արդյունքում ակտիվ հեռուստադիտողները պառկում են քնելու շատ ուշ և քիչ քնում, քան անհրաժեշտ է օրգանիզմին: Ինչպես հիշեցնում են փորձագետները, եթե քունը տևում է 7-8 ժամից պակաս, ապա մարդու մոտ զարգանում է ճարպակալում և մեծանում հիվանդությունների թվաքանակը:
Եվ վերջապես, պարբերականը հղում է անում հետազոտությանը, որը հրապարակվել է Ամերիկյան բժշկական ասոցիացիայի ամսագրում: Հետազոտության համաձայն՝ հեռուստացույցի առջև ավելի քան 2-3 ժամ օրական նստելը սպառնում է սրտային հիվանդությունների, դիաբետի և վաղաժամ մահվան բարձր ռիսկով: