Նավթային դարն աշխարհում վերջացել է, կարծում է «Սբերբանկի» ղեկավար, ՌԴ տնտեսական զարգացման նախկին նախարար Գերման Գրեֆը. Չինաստանը՝ ածխաջրածինների խոշորագույն սպառողը, արագ տեմպերով էներգիայի այլընտրանքային աղբյուրներ է ստեղծում: Այս մասին հայտնում է RIA Novosti-ն:
Գրեֆի խոսքով՝ Չինաստանն առաջիկա տարիներին էներգիայի վերականգնվող աղբյուրներով աշխատող էլեկտրակայանների հզորությունը կմեծացնի մինչև 560 ԳՎտ:
«Ամենամոտ կանխատեսումն է, որ Չինաստանն այն տեմպերով, որոնցով այսօր այլընտրանքային էներգետիկա է ստեղծում, կսպառի… մոտավորապես մինչև 45%-ով պակաս էներգիայի ավանդական աղբյուրներից: Դա մեր ածուխն է, որը մենք մեծ ծավալով և´ մշակում ենք, և´ մատակարարում ենք, և´ շարունակում ենք շատ ներդնել չինական շուկայի համար հաշվարկված ածխի մեջ: Եվ ածխաջրածինները»,- ասել է Գրեֆը:
«Կարելի է ասել, որ այդ դարն անցյալում է մնացել: Այսօր հաստատ կարելի է ասել, ինչպես ասում են՝ քարի դարը վերջացել է ոչ թե որովհետև վերջացել են քարերը, լրիվ նույն կերպ կարելի է ասել, որ նավթային դարն արդեն վերջացել է…»,- կարծում է ռուսական խոշորագույն բանկի ղեկավարը:
