Քրդական Kurdishcenter.ru կայքում հրապարակվել է Քրդստանի համայնքների միության գործադիր կոմիտեի անդամ Ջեմիլ Բայըքի հոդվածը, որը նվիրված է Թուրքիայում քրդերի դրությանը և մասնավորապես վերջին օրերի ձերբակալությունների ալիքին.
«Երբ Թուրքիայի Բարձրագույն ընտրական խորհուրդը (YSK) վետո դրեց քուրդ 7 անկախ թեկնածուների առաջադրման վրա, քրդերը ոտքի ելան իրենց իրավունքները պաշտպանելու համար: Դրանից անմիջապես հետո թուրքական իշխանություններն ընկրկեցին, և YSK-ը չեղյալ հայտարարեց իր դրած վետոն:
Որոշ բացառություններով, թուրքական լրատվամիջոցները ոչինչ չհաղորդեցին այդ բողոքի ակցիաների ժամանակ պատճառված հրազենային վնասվածքների և արցունքաբեր գազից տուժած քուրդ անչափահասների մասին: Բայց եթե քուրդ դեռահասը վիրավորեր թուրք ոստիկանին, ապա դա կդառնար լրագրողների գլխավոր քննարկման թեման:
Փաստորեն, թուրքական մամուլը վերջին երկու ամիսների ընթացքում ոչինչ չի հաղորդել քրդերի վրա թուրք ոստիկանների իրականացրած հարձակումների մասին: Դա խոսում է այն մասին, որ ԶԼՄ-ները վերահսկողության տակ են և ոչնչով չեն տարբերվում 1990-ական թվականների ԶԼՄ-ներից, որոնց հովանավորում էին զինվորականները: Պետական հեռուստաալիքները մշտապես զբաղված են հակաքրդական քարոզչությամբ:
Խաղաղ քաղաքացիների վրա իրականացված ցանկացած հարձակման համար թուրքական կառավարությունը մեղադրում է տուժողներին: Վարչապետ Էրդողանը մշտապես արդարացնում է ոստիկանության դաժան քայլերը: Նրա գլխավորած կառավարությունը լրատվամիջոցներին արգելում է ցուցադրել անչափահասների վրա թուրքական ոստիկանության իրականացրած հարձակումների ու պետական տեռորի մասին տեսանյութերը: Մինչդեռ եթե թուրքական ոստիկանությունը պատասխան հարված է ստանում, ապա դա դառնում է քննարկման լայն առարկա: Այդ կեղտոտ քաղաքականությունը գործում է վաղուց ի վեր:
Ոչ մի այլ երկրում ոստիկանությունը հարձակում չի գործում քաղաքային իշխանություններին պատկանող ավտոմեքենաների վրա և չի ոչնչացնում դրանք, որոնց գործառույթը ժողովրդին օգնելն է: Թուրքական ոստիկանության համար քրդերը նույնն են, ինչ ցուլի համար` կարմիր թաշկինակը: Թուրքական ոստիկանությունը քրդական քաղաքները վերածել է քրդական բանտերի»:
Հիշեցնենք, որ երեկ քրդական Firat լրատվական գործակալությունը հայտնեց, որ YSK-ի վետոյի պատճառով քրդերի բողոքի ակցիաների ժամանակ` ապրիլի19-29-ը, զոհվել է 2 մարդ, ձերբակալվել` նվազագույնը 880 մարդ, որոնցից կալանվել են 120-ը: