Ադրբեջանական Apa լրատվական գործակալության փոխանցմամբ, Ստամբուլում Թուրքիան ու Ադրբեջանը քննարկել են ադրբեջանական գազի արտահանման ու տարանցման խնդիրը:
Քննարկմանը մասնակցել են Թուրքիայի էներգետիկայի ու բնական պաշարների նախարար Թաներ Յըլդըզը և Ադրբեջանի արդյունաբերության ու էներգետիկայի նախարար Նատիկ Ալիևը:
Վերջինիս խոսքերով, հանդիպման արդյունքներով ստորագրվելու են մի շարք համաձայնագրեր, որոնք առնչվելու են Թուրքիային ադրբեջանական գազի վաճառքին և թուրքական տարածքով ադրբեջանական գազի տարանցմանը Եվրոպա:
Թաներ Յըլդըզն, իր հերթին, նշել է, որ Թուրքիայի ու Ադրբեջանի միջև պայմանավորվածություն է ձեռք բերվել «Շահ-Դենիզ 2» գազահանքավայրի գազի արտահանման շուրջ:
Թուրք նախարարի խոսքերով, Թուրքիան այդ համաձայնագրի շրջանակներում պարտավորվել է «Շահ-Դենիզ 2» գազահանքավայրից տարեկան գնել 6 միլիարդ խորանարդ մետր գազ:
Բացի այդ, Թուրքիան պետք է հնարավորություն ընձեռի Nabucco և այլ նախագծերի միջոցով դեպի Եվրոպա 10 միլիարդ խորանարդ մետր գազի տարանցման համար:
Պլանավորված է փաստաթղթի նախապատրաստական աշխատանքներն ավարտել առաջիկա երկու շաբաթների ընթացքում:
Հիշեցնենք, որ օրեր առաջ թուրքական Akşam թերթը գրեց, որ Թուրքիան պատրաստվում է դադարեցնել ադրբեջանական գազի մատակարարումները Հունաստան. «Այսուհետ Թուրքիան Հունաստանի համար նախատեսված ադրբեջանական գազը կօգտագործի սեփական կարիքների համար: Խոսքը 750 միլիոն խորանարդ մետր գազի մասին է»: