Մեծ Բրիտանիայի վարչապետ Դևիդ Քեմերոնի հասցեին ուղղված ավելի քան 3000 թվիթ ամեն ամիս ջնջվում են առանց ընթերցվելու: Ինչպես հաղորդում է The Daily Telegraph-ը, վարչապետի աշխատակազմը դա մեկնաբանում է հաղորդագրությունների անբովանդակալից լինելով:
«Վարչապետին ուղղված դիմումները մնում են անպատասխան: Ամեն ամիս ավելի քան երեք հազար թվիթ, որոնք ուղարկվում են պաշտոնական Twitter Դաունինգ-սթրիթ-ով, ջնջվում են առանց ընթերցվելու: Ամեն օր վարչապետի հասցեին գալիս է 100-200 թվիթ»,- նշում է պարբերականը, որը սեփական հետաքննությունն է անցկացրել:
Վարչապետի աշխատակազմը ի պատասխան թերթի պաշտոնական հարցման՝ խոստովանել է, որ թվիթները ջնջվում են, քանի որ բացարձակապես բովանդակություն չունեն միկրոբլոգի ձևաչափի պատճառով, որը հաղորդագրությունը սահմանափակում է 140 նշաններով:
«Հաղորդագրությունների մեծ մասը կարևոր բովանդակություն չունեն, և դրանք բոլորը ջնջվում են: Սահմանափակումները, որոնք դնում է Twitter-ի ձևաչափը, հնարավորություն չեն տալիս սպառիչ և ամբողջական պատասխան տալ»,- ասվում է վարչապետի աշխատակազմի հաղորդագրության մեջ:
Դաունինգ-սթրիթը քաղաքացիներին խորհուրդ է տալիս կառավարությանը դիմել փոստի միջոցով, ոչ թե Twitter-ի կամ էլեկտրոնային նամակի:
«Սա լավագույն միջոցն է, եթե ձեր խնդիրն ունի անձնական բնույթ, կամ ցանկանում եք ստանալ ուղիղ պատասխան»,- նշվում է հաղորդագրության մեջ:
