Մինսկը պատրաստ է գործի դնել առավելագույն ջանքեր թուրք-ռուսական հակամարտության կարգավորման համար՝ հայտարարել է Բելառուսի արտգործնախարար Վլադիմիր Մակեյը։ Այս մասին հայտնում է BBC-ն։
«Բելառուս 1» հեռուստաալիքի եթերում նա ընդգծել է, որ իր երկիրը չի պատրաստվում միջնորդական ծառայություններ պարտադրել։ «Սակայն մենք գտնում ենք, որ միմյանց վրա ճնշումն ու պատժամիջոցները միջպետական հարաբերություններում խնդիրների լուծման մեթոդ չեն։ Ինչ վերաբերում է Ռուսաստանի ու Թուրքիայի միջև վերջին տարաձայնություններին, ես վստահ եմ, որ վաղ թե ուշ կհաջողվի լուծել այդ հակամարտությունը»,- ասել է Մակեյը։
Դիվանագետի խոսքով՝ Բելառուսի ղեկավարությունը շահագրգռված է, որպեսզի այդ հակամարտությունը կարգավորվի հնարավորինս շուտ, և պատրաստ է առավելագույն ջանքեր ներդնել դրա համար։ «Ճիշտ նույնպիսի, ինչպիսին անում ենք Ուկրաինայի հարցով»,- նշել է նախարարը։
Մոսկվայի ու Անկարայի հարաբերությունները կտրուկ սրվել են այն բանից հետո, երբ թուրքական ռազմաօդային ուժերը խոցեցին ռուսական «Սու-24» ռմբակոծիչը, որը մասնակցում էր Սիրիայում ահաբեկիչների դեմ գործողությանը։
