Google ընկերությունը Android սմարթֆոնների համար առաջարկել է ձայնային և տեսաչաթի նոր հնարավորություններ: Այս մասին խոսվում է ընկերության պաշտոնական բլոգում հրապարակված հոդվածում:
Տեսա- և ձայնային հաղորդակցության համակարգը կհայտնվի Google Talk բջջային հավելվածում: Միևնույն ժամանակ սմարթֆոնների տերերը կարող են խոսել և՛ իրար հետ, և՛ Gmail փոստային ծառայությունում տեսակապը տեղադրած օգտատերերի հետ:
Զանգերը կարելի է իրականացնել և՛ երրորդ ու չորրորդ սերնդի բջջային կապի միջոցով, և՛ անլար Wi-Fi կապի միջոցով: Որպեսզի իրականացվի տեսազանգը, ընդամենը պետք է սեղմել տեսախցիկի նկարով կոճակը, որը տեղակայված է Google Talk-ի էկրանի աջ անկյունում` օգտատիրոջ անվան կողքին:
Առաջինն այս համակարգով կարող են շփվել Nexus S սմարթֆոնների տերերը: Դրա համար նրանք պետք է նորացնեն իրենց Android OS-ը` փոխելով այն 2.3.4 տարբերակի: Հետագայում այս համակարգից կարող են օգտվել նաև Android 2.3 ու ավելի նոր օպերացիոն համակարգ ունեցող սմարթֆոնների տերերը:
Google-ն իր այս նոր համակարգը գործարկում է Apple-ից անմիջապես հետո: iPhone-ներ արտադրողը նմանատիպ ծրագիր FaceTime անունով թողարկել է 2010 թ. հունիսին: Այս ծրագրի օգնությամբ Apple-ի տերերը կարող են խոսել միմյանց, ինչպես նաև` Mac համակարգիչ ունեցողների հետ:
