ՀԱԿ ԱԺ խմբակցության և ՀԱԿ կուսակցության ընտրական շտաբի ղեկավար Լևոն Զուրաբյանը հանրահավաքի իր ելույթը սկսեց այսպես. «Սիրելի՛ ժողովուրդ, ապրեք: Եթե բանից բեխաբար մի արտասահմանցի զբոսաշրջիկ փորձեր ՀՀ իշխանությունների մասին եզրահանգումներ անել, թե ո՞ր երկրի ոստիկանապետին է երբևէ հաջողվել հազարավոր ցուցարարների ցրել՝ ոչ թե ջրցան մեքենաներով, այլ նրանց առաջնորդին աղոթքի տանելով և աղոթքներ սովորեցնելով: Նման մարդը տպել է հազարավոր կեղծ անձնագրեր, գրանցման տվյալներն է կեղծել, դարձել ժողովրդի կամքի բռնաբարման և իշխանության յուրացման գլխավոր գործիքը»:
Նա հավելեց, որ զարմացած մեր զբոսաշրջիկը կնախանձի նաև ՀՀԿ-ի հայրենասիրական զգացումներին, որովհետև նա չգիտի, որ նրա կոչերը ընդամենը ծխացած կույտ են, չգիտի, որ ՀՀ-ի ամենահայրենասեր, նժդեհական ուժը քաղաքապետ է նշանակում մի մարդու, որն արաբական շեյխի հարստություն է կուտակել:
«Դե շատ են էլի սիրում ՀՀԿ-ական տղաները մեր հայրենիքը, բայց հիմնականում գույքի տեսքով: Քրիստոնեության, հայրենասիրության և պարկեշտության դասեր տալիս են հենց այն մարդիկ, ովքեր հարստահարմամբ, կեղծիքով են զբաղվել: Ժամանակն է վերջ դնել»,-ասաց նա՝ հավելելով, որ լինում են պահեր, երբ ժողովուրդն անմիջական մասնակցությամբ ազդում է հայրենիքի ճակատագրի վրա:
Մայիսի 5-ին, ըստ Լևոն Զուրաբյանի, այդ բացառիկ հնարավորության օրն է, և եթե հայ ժողովուրդը մայիսի 5-ին քվեարկի ՀԱԿ-ի օգտին, մայիսի 5-ին կունենանք ավազակապետությունից ազատված մայրաքաղաք, որից հետո չորս տարի ոչ մի ընտրություն չկա և եթե չհասնենք արմատական փոփոխությունների, առաջիկա չորս տարիներին կհասնենք քայքայման, ճահճի:
Նրա խոսքով՝ գործելու ժամանակն է:
«Այսօր գլխավոր խնդիրն անտարբերությունն է: Ասում են, թե Տարոնն անցել է, թե ուր է անցել, մարդ չգիտի, եթե մի բան անցել է, բարոյականության սահմաններն է անցել», ասաց Լևոն Զուրաբյանը՝ ավելացնելով, որ հաշվի առնելով վախի մթնոլորտը, կարելի է իմանալ, թե ինչքան մարդ չի հայտնում իր կարծիքը, բայց քվերակելու է ՀԱԿ-ի օգտին:
Նա նաև ասաց, որ Տարոն Մարգարյանի կողմնակիցները խուճապահար են, նրանք չեն կարող պատասխանել տարրական հարցերին, ասել, թե որտեղից նրան այդ գումարները:
«Դուք այն մարդիկ եք, ովքեր լցված են վճռականությամբ, հույսով, համոզեք նրանց, ովքեր անտարբեր են, կորցրել են հույսը, եթե կարողանանք ժողովրդին ոտքի կանգնեցնել, մայիսի 5-ին տոնելու ենք հաղթանակ»,-եզրափակեց իր ելույթը Լևոն Զուրաբյանը՝ հաղ-թա-նակ վանկարկումներով:
