Սիրիայում Ռուսաստանի գործողությունները «Եվրոպայի պաշտպանության ակտ են»: Այդ մասին Սիրիայի նախագահ Բաշար Ասադը հայտարարել է EFE գործակալությանը տված հարցազրույցում։
Պատասխանելով այն հարցին, թե ինչ է խնդրել Պուտինը ԴԱԻՇ-ի դեմ մղվող պայքարում Սիրիայի իշխանություններին ցուցաբերվող օգնության դիմաց, Ասադն ասել է. «Նա փոխարենը ոչինչ չի խնդրել մի պարզ պատճառով՝ սա առևտուր չէ: Երկու երկրների միջև բնականոն հարաբերություններն իրապես հիմնված են ընդհանուր շահերի վրա»: Մոսկվան «կայունություն է ցանկանում Սիրիայում, Իրաքում և ամբողջ տարածաշրջանում»,-հավելել է նա:
«Մենք հեռու չենք գտնվում Ռուսաստանից, թույլ տվեք ինձ հավելել՝ նաև Եվրոպայից։ Այդ կապակցությամբ Սիրիայում Ռուսաստանի գործողությունները Եվրոպայի պաշտպանության ակտ են»,-ասել է նա: Վերջերս Եվրոպայում տեղի ունեցած ահաբեկչական գործողություններն այն բանի ապացույցն են, որ այն, ինչ տեղի է ունենում Սիրիայում, ազդեցություն Է գործում նաև եվրոպական աշխարհամասի վրա՝ ընդգծել է Ասադը։
