Վերաքննիչ դատարանը մերժել է վարույթ ընդունել պարտատիրոջն առևանգելու և սպանելու փորձ կատարելու մեջ մեղադրվող 24-ամյա Վռամ Գյոզալյանի պաշտպանի բողոքը: Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի վճռով նա դատապարտվել է 12 տարվա ազատազրկման, Վերաքննիչ դատարանը վճիռն անփոփոխ էր թողել:
«Առաջին լրատվական»-ի հետ զրույցում Գյոզալյանի պաշտպան Աննա Թամազյանը նշեց, որ ինչպես առաջին ատյանի, Վերաքննիչ դատարանի որոշումներն էին «չհիմնավորված», այնպես էլ «չհիմնավորված» է այն, որ Վճռաբեկ դատարանը հրաժարվել է վարույթ ընդունել բողոքը: Նա հիշեցրեց, որ Վճռաբեկ դատարանը հունիսի 5-ին բողոքը վերադարձրել էր, և 20 օր էր տևել տեխնիկական սխալները շտկելու և ուղարկելու համար: Սահմանված ժամկետում փաստաբանը շտկել և ուղարկել է դատարան, բայց մոտ երեք ամիս անց Վճռաբեկը բողոքը հետ է ուղարկել՝ մերժելով վարույթ ընդունել:
Աննա Թամազյանը նաև ընդգծեց, որ Վճռաբեկ դատարանը կրում է ձևական բնույթ, քանի որ 3-հատորանոց բողոքն անգամ չեն կարդացել, փաստաբանին գործը հետ ուղարկելիս կցել են փաստաթուղթ՝ անդորրագրի պատճեն, որը գործի հետ կապ չունի. «Հարգելի Վճռաբեկ դատարան, եթե ինչ-որ փաստաթուղթ եք կորցրել իմ կոլեգաների կողմից տրված, դա ինձ մոտ է, խնդրում եմ՝ իմն էլ ուղարկեք ինձ»,- հորդորեց նա:
Աննա Թամազյանը հայտարարեց, որ փետրվարի 5-ից ներգրավված է գործում և այնտեղ բազմաթիվ խախտումներ է արձանագրել՝ նախաքննությունից մինչև դատական գործընթացներ: Նա մանրամասնեց, որ Վռամ Գյոզալյանը մեղադրվում է ՀՀ քր.օր.-ի 34-104-րդ հոդվածի 2-րդ մասի 3-րդ և 8-րդ կետերով և 131 հոդվածով, որն իրականում չի կատարել, այսինքն՝ գործը քննվում է կանխամտածված սպանություն և առևանգում հոդվածների շրջանակներում, ՀՀ քրեական օրենսգրքի 112-րդ հոդվածի 1-ին մասով, 5 նախադեպեր արդեն իսկ կան:
Հիշեցնենք, որ միջադեպը տեղի է ունեցել 2013 թվականին: Վռամ Գյոզալյանը, ով Գևորգ Կարապետյանին պարտք էր 8 հազար ամերիկյան դոլար, հանդիպել է խոսելու համար: «Վռամ Գյոզալյանը դատարանում հաստատել է, որ ցանկություն չի ունեցել սպանություն իրականացնելու, և առևանգում տեղի չի ունեցել, այդ մասին վկայել է նաև տուժողը՝ դատարանում հայտարարելով՝ հո ես հա՞վ չեմ, որ ինձ առևանգեն, բայց միևնույն է՝ մեղադրող դատախազը կրկին շեշտում էր առևանգման փաստը, այնինչ տուժողը իր կամքով է մեքենան նստել»,- մանրամասնեց փաստաբանը՝ ասելով, որ տուժողին Վռամը մարմնական վնասվածքներ է հասցրել սառը զենքով, սակայն սպանելու մտադրություն չի ունեցել, ինչը հաստատվում է նաև մեքենայում առկա կրիչի ձայնագրությունից:
Աննա Թամազյանը մանրամասնեց, որ իր պաշտպանյալը 8000 ԱՄՆ դոլարի փոխարեն նոտարով որպես գրավ էր դրել ավտոտնակը, հետագայում ավտոտնակը անցել է տուժողին։ Վերջինս այն վաճառել է 13 հազար դոլարով. «Այսինքն՝ այստեղ արդեն Վռամը շահադիտական ոչինչ չուներ. այդ մասին անգամ դատավորն է արձանագրել: Ուղղակի Վռամը, նրա ընկերը և տուժողը մեքենայով գնացել են զրուցելու, ճանապարհին տուժողը հայհոյել է, սեռական բնույթի հայհոյանքներ են հնչել, 24-ամյա տղա է, բռնկվել է»,- ընդգծեց նա:
Աննա Թամազյանի կարծիքով՝ գործում խնդիրները և թնջուկը սկսում են նախ նրանից, որ թե առաջին և թե Վերաքննիչ ատյանի դատարանների դատավորները վճիռ կայացնելիս վազում են Վճռաբեկ՝ «դաբրո» ստանալու, ուստի Վճռաբեկը չի կարող ինքն իրեն բեկանել և երկրորդ՝ նրանից, որ գործում շահագրգռվածություն է ունեցել գլխավոր դատախազի տեղակալը Հրաչ Բադալյանը, մեղադրող դատախազը դատարանում նշել է, որ ինքը Վռամի դեմ անձնական ոչինչ չունի, բայց 15 տարի ժամկետը առաջարկվել է դատախազությունում գլխավոր դատախազի տեղակալի կողմից:
«Առաջին լրատվական»-ի հետ զրույցում Վռամ Գյոզալյանի հայրը ՝ Վարազդատ Գյոզալյանը, ընդգծեց, որ հայաստանյան դատական համակարգից այլևս հույսեր չունեն. 24-ամյա որդու կյանքը խեղում են անարդար վճիռներով, ուստի կդիմեն Եվրադատարան:
Առավել մանրամասն՝ տեսանյութում:
