Չնայած վարորդների բազմաթիվ բողոքներին, ՀՀ կառավարությունը դեմ է ճանապարհատրանսպորտային խախտումների տուգանքների նվազեցմանը։ ԱԺ պաշտպանության, ազգային անվտանգության և ներքին գործերի հանձնաժողովում այսօր քննարկվեցին «Ճանապարհային երթևեկության անվտանգության ապահովման մասին» և «Վարչական իրավախախտումների օրենսգրքում» փոփոխություններ կատարելու մասին օրենքների նախագծերը։
Ըստ օրինագծի համահեղինակ Հովհաննես Մարգարյանի՝ հաշվի առնելով ժողովրդի սոցիալ-տնտեսական վիճակը, իրենք առաջարկում են նվազեցնել ոչ էական խախտումների համար տուգանքները, դրանք 5 հազար դրամի փոխարեն սահմանելով 3 հազար դրամ։ Արդարադատության փոխնախարար Արսեն Մկրտչյանը, ներկայացնելով կառավարության բացասական եզրակացությունը, ասաց, որ կառավարությունը չի գտնում, որ տուգանքները բարձր են, ավելին, որոշ խավի համար և որոշ դեպքերում անգամ ցածր են։
«Իրականում դրանք միգուցե շատ ավելի ցածր են և այլ խնդիրներ են առաջացնում»,- ասաց արդարադատության փոխնախարարը։
Միևնույն ժամանակ չեն դադարում վարորդների բողոքները, որ տուգանքների մուծման տվյալները հաճախ կորում են ոստիկանությունում և եթե իրենք կտրոնը չպահեն, ստիպված են կրկնակի մուծումներ կատարել։ ՀՀ փոխոստիկանապետ Սամվել Հովհաննիսյանից հետաքրքրվեցին, թե ինչն է նման իրավիճակի պատճառը։
Դրսում մեզ հետ զրուցած վարորդները հակադրաձեցին տուգանքների չափերը մի բան էլ ցածր համարող կառավարության ներկայացուցչին։
Մանրամասները դիտեք տեսանյութում։
