Լրագրողների հարցերին պատասխանում է ԱԺ նախագահ Գալուստ Սահակյանը
– Պարոն Սահակյան, կարծիք կա, որ իշխանությունները սահմանադրական փոփոխությունները նախաձեռնել են և նախագահի ինստիտուտը թուլացնում են, որպեսզի նախկին նախագահներ Ռոբերտ Քոչարյանն ու Լևոն Տեր-Պետրոսյանը չհավակնեն այդ պաշտոնին:
– Գիտեք, կարելի է ամեն ինչ ենթադրել: Եթե ուզում եք իմանալ, քաղաքական կուսակցությանը ձեռնտու է միակենտրոն ղեկավարությունը: Դրանից պիտի հեռանալ և պիտի պետական մտածողությամբ գնալ: Այնպես որ՝ եթե խոսքը վերաբերում է Հանրապետական կուսակցությանը, ապա այսօր այն ցանկացած դիրքերում էլ շահեկան պայմաններում է, մեր ռեզերվները նկատի ունեմ:
– Ուզում եք ասել, որ միևնույն է՝ Հանրապետական կուսակցությո՞ւնն է հաղթելու:
– Դա հաղթանակ չէ, դա արդյունքների ձեռքբերում է, որովհետև հիմնականում մենք ենք կարողացել զբաղվել խնդիրներով: Ընտրությունների ընթացքում շտաբներ են բացում, հետո օգտագործելով ԱԺ ամբիոնն ու Ազատության հրապարակը՝ մոռանում են ժողովրդին: Այս նոր մոդելով դրա կարիքն այլևս չի լինելու: Ընդդիմությունն ունենալու է համապատասխան լծակներ, որ ցանկացած խնդրի մասնակից է լինելու: Փորձում են վարկաբեկել՝ իբր թե հանրապետությունում գլխավոր մի բոբո կա, որից պետք է ազատվել: Ես էլ ասում եմ՝ ցույց տվեք մեկին, ով կենսագրական այնպիսի արարումներ ունենա իր դերակատարման ընթացքում: Ասում են՝ Լ. Տեր-Պետրոսյանը, Ռ. Քոչարյանը: Դեմ չեմ: Նրանք էլ են դերակատարում ունեցել և կարող էին ունենալ: Բայց եկեք տեսեք, որ նրանք էլ համապատասխան թիմ չունեն: Ուրիշ որևէ մեկի անունը տվեք:
– Ուզում եք ասել, որ ՀՀԿ-ի դեմ խաղ չկա՞:
– Ոչ, ՀՀԿ-ի դեմ միշտ խաղ կա: Այդ խաղի կանոններն այնպես ենք տանում, որ խաղ լինի: Դրա համար հաջորդ խորհրդարանում ռազմավարական նշանակություն ունեցող օրինագծերն առանց ընդդիմության հնարավոր չի լինի տանել:
– Բայց եթե ընդդիմությունն իշխանության հետ համաձայնության չի գալիս, քվեարկությունն ինչպե՞ս է տեղի ունենում:
– Ուրեմն օրինագիծը քվեարկությունով չի անցնի: Մեծամասնությունն առանց ընդդիմության չի կարող որոշել:
– Պարոն Սահակյան, եթե ՀՀԿ-ի իշխանությունն այդքան լավն է, այդ դեպքում ձեր կուսակցության իշխանության ընթացքում ինչո՞ւ է աղքատությունը խորացել, և ինչո՞ւ է արտագաղթը գնալով ավելանում: Ու նման պայմաններում ինչպե՞ս է, որ ընտրական գործընթացներում ՀՀԿ-ն հաղթում է:
– Այսօր ո՞ր թիմը կարող է գալ իշխանության, և նույնը չլինել: Աղքատությունը և մյուս բոլոր խնդիրները գալիս են և՛ մեր աշխարհագրական դիրքից, և՛ մեր խնդիրների դժվարություններից: Ես չեմ կարծում, որ եթե իշխանությունը փոխվի, ինչ-որ մեկը կգա ու հաջորդ օրը կլավացնի: Ձեր նշած մոնոպոլիաները սովորաբար ծնվում են միակենտրոն իշխանությունից: Ի դեպ, ասեմ, որ 90-ականների սկզբին մեր երկրի կառավարման մոդելը խորհրդարանական էր, հենց դարձավ նախագահական, սկսվեց այդ շարժը գնալ: Հիմքերն այնտեղ որոնեք: Հիմա մենք ուզում ենք այդ հիմքերը ոչնչացնել:
– Սամվել Ալեքսանյանի խանութներում արդեն «Այո»-ի ցուցակներ են հավաքում: Այսինքն՝ մոնոպոլիստը շահագրգռված է, որ անցնեն այդ փոփոխությունները:
– Մարդիկ ասում են, թե իշխանության ներկայացուցիչներն ու ձեր ասած մոնոպոլիստներն ինչու են քարոզչությամբ զբաղվում: Ցանկացած քաղաքական թիմ ինչ ուժեր ունի, դրանցով է հանդես գալիս:
– ՀՀԿ-ի մեղքը չկա՞ այն վիճակի մեջ, որ այսօր, ինչպես Դուք եք ասում, քաղաքական դաշտում կարող ուժ չկա: Արդյոք Հանրապետակա՞նը չփոշիացրեց ընդդիմադիր ուժերին: Թեկուզ հիշենք փետրվարին «Բարգավաճ Հայաստան» կուսակցության ու նրա նախկին ղեկավար Գագիկ Ծառուկյանի հետ տեղի ունեցած իրադարձությունները, երբ վերջինիս հեռացրեցիք քաղաքականությունից:
– Բայց քաղաքական պրոցեսներն այնպիսին են, որ եթե քաղաքական ուժերը տեսնում են, որ ինչ-որ վտանգներ կան, որ հակասահմանադրական կոչերի պայմաններում պիտի ընթանան, բնականաբար, դա վտանգավոր է:
– Գ. Ծառուկյանը հակասահմանադրական կոչե՞ր էր անում:
– Ես կարծում եմ, որ նրա վերջին կոչերը միգուցե կարելի էր համարել հրապարակախոսական, բայց դրանց մեջ պետության և ձեզ համար վտանգներ կային: Քաղաքական վիճակն այնպիսին էր, որ ժողովրդին դրդելու ճանապարհով էր գնում: Եվ այստեղ միայն Ծառուկյանին չպիտի մեղադրել, այդտեղ կար Լ. Տեր-Պետրոսյանի մատը, այդտեղ այնքան մատներ կային, որոնք օգտագործելով Գ. Ծառուկյանի ստեղծած ուժը՝ իրենց հաշվեհարդարային ընթացքն էին ապահովել:
– Ֆինանսների նախարար Գագիկ Խաչատրյանը հայտարարեց, թե անցած 8-9 ամիսների ստուգումների արդյունքում Գ. Ծառուկյանի բիզնեսներում որևէ էական խախտում չեն հայտնաբերել: Սերժ Սարգսյանը նրա հետ մասնակցում է տարբեր միջոցառումների: Փաստորեն ձեր կուսակցությունում եղած կարծիքները, թե Գ. Ծառուկյանը չարիք է, հերքվեցին: Եվ նա արդեն կարո՞ղ է վերադառնալ քաղաքականություն:
– Հիմա պիտի գուշակություննե՞ր անենք, թե այս կամ այն քաղաքական գործիչն ինչ է անելու: Մենք չենք թույլ տվողը: Եթե թույլ տվողը մենք լինեինք, այսօր դուք ինձ չէիք կարող հարցեր տալ:
– Բայց Ձեր կուսակիցներն էին հայտարարում, թե դուք խնդիր չունեք Ծառուկյան գործարարի հետ, դուք խնդիր ունեք Ծառուկյան քաղաքական գործչի հետ:
– Գ. Ծառուկյանի անունն եք անընդհատ շոշափում, բայց ես ցույց տվեցի այն ծավալները, թե ովքեր էին ուզում նրա միջոցով խնդիր լուծել: Չկա Գ. Ծառուկյանը, բոլորը մարաղ մտան:
– Այսինքն՝ Գ. Ծառուկյանին քաղաքականությունից հեռացնելով՝ դուք փորձեցիք Լ. Տեր-Պետրոսյանի ու Ռ. Քոչարյանի վերադա՞րձը կասեցնել:
– Ոչ: Մենք մեր հայտարարությունը արեցինք, որ չենք թողնելու հակասահմանադրական որևէ թիմի գործողություն: Այն, որ հնչում էր, թե արյուն կթափվի և այլն:
– Գ. Ծառուկյանի ամենաակնհայտ և ամենաապացուցված խախտումն այն է, որ նա չի մասնակցում ԱԺ նիստերին: Այս դեպքում պատժողը Դուք եք, բայց քայլեր չեք ձեռնարկում:
– Գ. Ծառուկյանին հանգիստ թողեք: Չեմ պատժում, որովհետև դա իմ լիազորությունն է: Դա ես եմ որոշում: Դրա համար էլ նոր Սահմանադրությամբ դա վերցրել ենք ԱԺ նախագահի գործառույթներից: Այսինքն՝ պատգամավորների հաճախումները կուսումնասիրի իրավաբանորեն ձևավորված հատուկ խորհուրդը:
Լուսանկարը՝ Armenpress-ի
