Հռոմի պապ Ֆրանցիսկոսը Վատիկանի գաղտնի փաստաթղթերի արտահոսքն անվանել է զազրելի հանցագործություն, սակայն նշել, որ դա չի ազդի կաթոլիկ եկեղեցու բարեփոխումների անցկացման վրա։ Այս մասին փոխանցում է Daily Mail-ը։
«Ցանկանում եմ ասել, որ այդ տխուր փաստը, միանշանակ, ինձ չի շեղի բարեփոխումից, որն անցկացվում է իմ օգնականների և Ձեր բոլորի աջակցությամբ»,- ասել է Վատիկանի առաջնորդը հազարավոր հավատացյալների հետ հանդիպման ժամանակ, ովքեր հավաքվել էին Հռոմի Սուրբ Պետրոսի հրապարակում։
Պարբերականը հայտնում է, որ անցած շաբաթ երկու մարդու ձերբակալել էին Պապի փաստաթղթերի գողության կասկածանքով։ Նրանցից մեկը եղել է Սուրբ գահի ներկայացուցչը, մյուսը՝ PR-ի ոլորտում աշխատող իտալուհի։
Ենթադրվում է, որ կասկածյալները տեղեկություններ են գողացել դրանք Վատիկանի մասին գրքի հեղինակներին տրամադրելու համար։
