Վրացական Georgia Times կայքի փոխանցմամբ, Վրաստանի փոխարտգործնախարար Նինո Քալանդաձեն անդրադարձել է Ռուսաստանի արտգործնախարար Սերգեյ Լավրովի` Աբխազիա և Հարավային Օսիա այսօրվա այցին.
«Լավրովի այցը դասական քայլ է, երբ զավթիչ երկիրը ցանկանում է օրինականացնել իր ապօրինի որոշումներն ու գործողությունները: Սակայն այդ փորձը հաջողություն չի ունենա: Ռուսաստանի գործողությունները համարվում են նրա օկուպացիոն ու անեքսիոն քաղաքականության շարունակությունը և ցինիկ վերաբերմունք միջազգային իրավունքի սկզբունքների նկատմամբ:
Ցինիկ են թե´ Լավրովի այդ այցը, թե´ դրանից առաջ հնչեցված այն հայտարարությունը, որ իրենք չեն բացառում Վրաստանի կողմից հնարավոր նոր ռազմական սադրանքների գնալը: Համայն աշխարհը գիտի, որ Վրաստանը ոչ ոքի վրա չի հարձակվի և հատկապես՝ սեփական տարածքում, քանի որ նա ուժի չկիրառման մասին միջազգային պարտավորություններ է ստանձնել:
Ընդհակառակը, հենց Ռուսաստանն է այն երկիրը, որը, չնայած միջազգային հանրության ակտիվ կոչերին, հրաժարվում է հանդես գալ համարժեք (ուժի չկիրառման մասին) հայտարարությամբ»:
Հիշեցնենք, որ Լավրովը Սուխումում հանդիպում է ունեցել Աբխազիայի նախագահ Սերգեյ Բաղապշի և վարչապետ Սերգեյ Շամբայի հետ: Լավրովը նաև հարգել է 1992-1993 թվականների վրաց-աբխազական պատերազմի զոհերի հիշատակը:
