Ինդոնեզական արդեն երրորդ՝ «Բլիմբինգսարի» օդանավակայանը Ճավա կղզու Բանվանգի քաղաքում չորեքշաբթի փակվել է Լոմբոկ կղզում Ռինջանի հրաբխի ժայթքման հետ կապված: Detik.com պորտալի հաղորդմամբ՝ այս մասին հայտարարել է Ինդոնեզիայի տրանսպորտի նախարարության օդային տրանսպորտի վարչության գլխավոր տնօրեն Սուպրասետյոն:
««Բլիմբինգսարին» Բանվանգիում փակվել է հրաբխային մոխրի տարածման հետ կապված»,- ասել է նա:
Ավելի վաղ հաղորդվում էր մինչև նոյեմբերի 5-ի առավոտ «Նգուրահ-Ռայ» և «Սելապարանգ» օդանավակայանների լրիվ փակման մասին:
Տրանսպորտի նախարարության տեղեկատվական ծառայության տվյալներով՝ այդ միջոցառումներն արդեն հանգեցրել են մոտ 700 ինչպես միջազգային, այնպես էլ՝ ներքին ավիաչվերթների չեղարկման:
Հրաբխի խառնարանից վերջին արտանետումները մոխրի հաստ շերտով են ծածկել 7 գյուղ Լոմբոկի հյուսիսային մասում, տեղի իշխանությունները ներկայումս պատրաստվում են Ռինջանիի լանջերից մոտ 40 000 մարդու հնարավոր տարհանման:
Ռինջանիի հերթական ժայթքումը սկսվել է հոկտեմբերի վերջին: