Գուանտանամոյում (Կուբա) ԱՄՆ ռազմածովային ուժերի բազայում գտնվող հատուկ բանտում ընդհարումներ են տեղի ունեցել բանտարկյալների և անվտանգության աշխատակիցների միջև: Այս մասին հայտնել է ԱՄՆ ռազմածովային ուժերի կապիտան Ռոբերտ Դյուրանը՝ փոխանցում է ITAR-TASS-ը:
Նրա խոսքով՝ բանտարկյալների մի մասը վարագույրով փակել էին իրենց խցերի պատուհանները, ինչպես նաև հագուստով փակել տեսահսկման խցիկները: Դյուրանի խոսքով՝ բանտարկյալների նկատմամբ մշտական վերահսկողությունն անհրաժեշտ է կարգուկանոնի ու անվտանգության պահպանման համար, այդ իսկ պատճառով որոշում է ընդունվել ներխուժել խցեր և այնտեղից դուրս բերել այն ամենը, ինչը խանգարում է անվտանգության պահպանմանը:
Դա պատճառ է դարձել, որպեսզի բանտարկյալները հարձակվեն անվտանգության աշխատակիցների վրա: Վերջիններս ստիպված են եղել մի քանի անգամ օդ կրակել՝ նրանց հանդարտեցնելու համար: Դյուրանն ընդգծել է, որ կարգուկանոնը վերականգնվել է, կողմերից ոչ ոք լուրջ վնասվածքներ չի ստացել: Նա հայտնել է, որ խռովությունը տեղի է ունեցել բանտի այն հատվածում, որտեղ փետրվարի վերջին 43 բանտարկյալներ հացադուլ էին հայտարարել՝ ի նշան բողոքի իրենցից անձնական իրերի առգրավման դեմ:
Ընդհանուր առմամբ Գուանտանամոյում ներկայում պահվում է 166 մարդ: Նրանց մեծ մասը գերեվարվել են ԱՄՆ հատուկջոկատայինների կողմից ավելի քան 10 տարի առաջ անցկացված հակաահաբեկչական օպերացիաների ժամանակ: