Մեծ Բրիտանիայի նախկին վարչապետ Մարգարետ Թետչերի քաղաքական ժառանգության հազարավոր հակառակորդներ երեկ հանրահավաք են անցկացրել Լոնդոնի Թրաֆալգար հրապարակում: Չարտոնված ակցիայի ժամանակ հրապարակի մեծ մասը ցուցապաստառներով զբաղեցրել էր աղմկոտ ակտիվիստների բազմությունը: Ակցիան սկսվել էր տեղի ժամանակով ժ. 18.00-ին (Երևանի ժամանակով՝ ժ. 21.00-ին): Այս մասին հայտնում է ITAR-TASS-ը:
Չնայած անձրևին՝ մարդիկ եկել էին իրենց բողոքն արտահայտելու քաղաքական տարբեր պատճառներով: Ակցիան անցել է խաղաղ, մասնակիցներն ագրեսիա չեն դրսևորել:
Ցուցարարների շարքում նկատելի տեղ են զբաղեցրել հանքափորների ներկայացուցիչները, որոնք 1984-85թթ. մեկ տարի գործադուլ են արել ընդդեմ Թետչերի կոշտ տնտեսական քաղաքականության: Ակցիային մասնակցել են նաև անարխիստները, այդ թվում՝ Occupy շարժումը, սոցիալիստները, ուսանողները և կապիտալիզմի դեմ շարժման կողմնակիցները:
Հանրահավաքին մասնակցել են տարբեր հետաքրքրությունների տեր մարդիկ: Ժամանակ առ ժամանակ հնչել է Ding Dong the Witch is Dead («Վհուկը մեռած է») երգը՝ «Օզ երկրի հրաշագործը» Wizard of Oz (1939) ֆիլմից: