ԵԱՀԿ Մինսկի խմբի համանախագահները նախատեսում են կազմակերպել Հայաստանի և Ադրբեջանի արտգործնախարարների հանդիպում՝ Լեռնային Ղարաբաղի հակամարտության խաղաղ կարգավորման առաջխաղացման նպատակով: Այս մասին հաղորդում է RIA Novosti-ն՝ վկայակոչելով կազմակերպության հայտարարությունը:
ԵԱՀԿ Մինսկի խմբի համանախագահներ Ժակ Ֆորը (Ֆրանսիա), Յեն Քելին (ԱՄՆ) և Իգոր Պոպովը (Ռուսաստան) տարածաշրջան են այցելել մարտի 18-22-ը և ապրիլի 1-6-ը՝ օգնելու համար կողմերին, որ ԼՂ հակամարտության խաղաղ լուծում գտնեն:
Ապրիլի 9-ին համանախագահներն ընթացիկ իրավիճակի մասին տեղեկացրել են Վիեննայում գտնվող ԵԱՀԿ Մինսկի խմբի դեսպաններին:
Հաղորդագրության մեջ նշվում է, որ ԵԱՀԿ Մինսկի խմբի համանախագահները տարածաշրջանում հանդիպել են Հայաստանի և Ադրբեջանի ղեկավարության հետ: Նրանք հանդիպել են նաև ԼՂ իշխանությունների հետ:
Համանախագահները տեղեկացրել են հայ-ադրբեջանական շփման գծում ընթացիկ իրավիճակի մասին: Նրանք նշել են, որ Զատկի և Նովրուզի տոների ժամանակ շփման գծում նկատվել է հարաբերական անդորր, և հույս են հայտնել, որ դա կշարունակվի:
Հաղորդագրության մեջ նշվում է, որ Հայաստանի և Ադրբեջանի նախագահները հաստատել են իրենց հակվածությունը խաղաղ գործընթացին և կողմ են բարձր մակարդակով հանդիպումների շարունակականությանը:
