Վրացական Georgia Times կայքի փոխանցմամբ, Վրաստանի ֆուտբոլային ընտրանու ավագ Կախա Կալաձեն հայտարարել է, որ երկրի իշխանությունները վարում են սեփական քաղաքացիներին ճնշելու քաղաքականություն և ցանկանում են հաստատել ստալինյան ռեժիմ.
«Վրաստանի ժողովուրդն ապրում է աղքատ պայմաններում, ակներև է քրեակատարողական համակարգի ծանր վիճակը, ընտրական արդարադատությունը նույնպես մեծ խնդիրներ ունի, գործնականում չեն գործում քաղաքացիական հասարակությունն ու հասարակական կազմակերպությունները: Վրաստանը վերադարձ է կատարել 1937 թվականին»:
Նշվում է, որ Կալաձեի այս զայրույթը պայմանավորված է նրանով, որ նախորդ տարվա հուլիսի սկզբին Թբիլիսիում ձերբակալվել էր մեկ այլ հանրահայտ վրաց ֆուտբոլիստ Գեորգի Դեմետրաձեն: Վերջինս մեղադրվել էր հանցագործ աշխարհի հետ կապեր ունենալու և ընդհատակյա տոտալիզատորին մասնակցելու մեջ: Դրա համար Թբիլիսիի քաղաքական դատարանը նրան դատապարտել էր վեցամյա բանտարկության:
Դրանից հետո Կալաձեն բազմիցս հայտարարել էր Դեմետրաձեին իր աջակցության մասին` ընդգծելով, որ դատարանի վճիռն անարդար է: