«Պետք է հիշեցնեմ, որ ՀՀԿ-ն երբեք առաջին վիրավորանքի լեզվով չի խոսել: Վիրավորանքը մեզ համար երբեք գործունեության ոճ չի եղել, բայց ով փորձել է ՀՀԿ-ի հետ վիրավորանքի կամ շանտաժի լեզվով խոսել, տասնապատիկ անգամ պատասխան է ստացել, ու եթե այսուհետ կրկին փորձեն նույն շանտաժի ու վիրավորանքի լեզվով խոսել նույն կերպ պատասխան կստանան»,- «Առաջին լրատվական»-ի հետ զրույցում ասաց ՀՀԿ փոխնախագահ Ռազմիկ Զոհրաբյանը՝ մեկնաբանելով ԲՀԿ առաջնորդ Գագիկ Ծառուկյանի երեկվա հայտարությունը:
Հիշեցնենք, որ երեկ «Մոսկվա» կինոթատրոնում իր կուսակցության ակտիվի հետ հանդիպման ժամանակ Գագիկ Ծառուկյանը հայտարարել էր. «Ով ԲՀԿ-ին վիրավորի, ինձ հետ անձամբ է գործ ունենալու»:
Ռազմիկ Զոհրաբյանը նաև ավելացրեց, թե «ճիշտ կլինի, որ որոշ քաղաքական ուժեր իրենց ներսում գործող ճորտատիրական կարգերը չտարածեն ողջ քաղաքական դաշտի վրա»:
Երևանի ավագանու ընտրությունների հետ կապված՝ գնալով կոշտանում են ԲՀԿ-ի հայտարարությունները: Ի տարբերություն նախագահական ընտրություններին, որին ԲՀԿ-ն չմասնակցեց, այս ընտրություններին մասնակցում է և ձգտում է զբաղեցնել գոնե երկրորդ տեղը, և այդ մրցակցության արդյունքում գնալով երկուստեք լարվածությունը խորանում է:
Հարցին, թե միգուցե դա ոչ թե մրցակցության, այլ ՀՀԿ-ի ու ԲՀԿ-ի միջև առկա խորը հակասությա՞ն արդյունք է, Ռազմիկ Զոհրաբյանը պատասխանեց. «ՀՀԿ-ն ու ԲՀԿ-ն քաշային տարբեր դիրքերում են: Մենք բոլոր ուժերին հարգում ենք, բայց ԲՀԿ-ն դեռ պետք է երկար ճանապարհ անցնի, որ հասնի ՀՀԿ-ին, և եթե ԲՀԿ-ն իրեն բավականաչափ ուժեղ է զգում, թող մասնակցեր նախագահական ընտրություններին: Ազդեցիկ ուժը նախագահական ընտրություններին որևէ դիրքորոշում ունենում է կամ մյուս ուժերի նման գոնե կարծիք է հայտնում: Եվ եթե այդքան ազդեցիկ էին, թող որևէ կարծիք հայտնեին: Նախագահական ընտրություններին թեկնածու չէին առաջադրել, գոնե կարող էին որևէ մեկին պաշտպանել»։
