Ճապոնիայի Հոկայդու կղզու հյուսիսային շրջաններից մեկի բնակչուհիները իրենց բնակարանը մաքրելու ժամանակ պատահմամբ հայտնաբերել են իրենց հարազատի մումիայի վերածված աճյունը, հաղորդում է Life News-ը:
Պարզվել է, որ 2010թ. 48-ամյա տղամարդը գրեթե չի շփվել իր հարազատների հետ: Մակո Տադանոն նախընտրել է իր ազատ ժամանակն անցկացնել ննջարանում՝ վայելելով մենությունը:
Կանանց խոսքերով՝ որոշ ժամանակ անց եղբայրը դադարել է երևալ: «Մեզ բոլորիս ձեռնտու էր նման վիճակը: Մենք չէինք խանգարում միմյանց, չնայած ապրում էինք նույն տանիքի տակ: Մենք, ամենայն հավանականությամբ, ոչինչ չէինք իմանա, եթե չպատրաստվեինք տեղափոխվել այլ բնակարան»,- խոստովանել է քույրերից մեկը:
Կինը մտել է Տադանոյի սենյակ և հայտնաբերել նրա մումիայի վերածված աճյունը: Կնոջ խոսքերով՝ ինքը շատ է վախեցել, որ իրեն կմեղադրեն եղբոր մահվան համար, այդ պատճառով մնացորդները դրել է պոլիէթիլենային տոպրակի մեջ և նետել աղբարկղը: Մի քանի օր անց այն հայտնաբերել են և ահազանգել ոստիկանություն:
Իրավապահ մարմինների աշխատակիցները հետաքննություն են սկսել: Նրանք պարզել են, որ մարմինը սենյակում մնացել է կես տարի: Հանգուցյալի ներքին օրգանները վնասված չեն եղել: Մահվան պատճառը դեռևս չի պարզվել:
Իշխանությունները եկել են այն եզրահանգման, որ քույրերն առնչություն չեն ունեցել նրա մահվան հետ, սակայն մոտ ժամանակներս նրանք պետք է պատասխան տան այն բանի համար, որ հրաժարվել են ոստիկանությանը հաղորդել եղբոր մահվան մասին:
