Վրացական newsgeorgia.ru կայքի փոխանցմամբ, Վրաստանի նախագահ Միխեիլ Սաակաշվիլին Փոթիի կառուցվող օդանավակայանում մասնակցել է նոր ռադիոտեղորոշիչ կայանի (ՌՏԿ) տեղակայման բացման արարողակարգին:
Ֆրանսիական «Թալես» ընկերության տեղադրած այդ ՌՏԿ-ի գործողության շառավիղը կազմում է 400 կիլոմետր, այսինքն` նրա տեսանելիության տակ են գտնվում Վրաստանի տարածքի մի մասը (արևմտյան-սևծովյան հատվածը), ինչպես նաև Հայաստանի, Ադրբեջանի, Ռուսաստանի, Թուրքիայի տարածքի մի մասը:
Սաակաշվիլին հայտարարել է. «Վրաստանի համար ռազմավարական նշանակություն ունեցող Փոթիի օդանավակայանն իր գործունեությունը կսկսի արդեն 2012 թվականին և հանդիսանալու է Սևծովյան ավազանի երկրների ամենամեծ և ռազմավարական օդնավակայանը: Փոթին Վրաստանի տնտեսության երաշխիքն է»:
Հիշեցնենք, որ օրեր առաջ էլ հայտնի դարձավ, որ նավահանգիստների համաշխարհային խոշորագույն օպերատոր hոլանդական APM Terminals ընկերությունը գնել է Փոթիի նավահանգստի բաժնետոմսերի 80 տոկոսը և պարտավորվել առաջիկա 5 տարիների ընթացքում տարածաշրջանի ներկրող և արտահանող կետ հանդիսացող Փոթիի նավահանգստի արդիականացման վրա ծախսել 100 միլիոն ամերիկյան դոլար: