Իտալիայի ոստիկանությունը քահանային ենթարկել է տնային կալանքի՝ 4 միլիոն եվրո հափշտակելու մեղադրանքով: Գումարը պատկանել է նրա կողմից ղեկավարվող կաթոլիկ հիվանդանոցին: Քահանան մեղադրվում է նաև այն բանում, որ միտումնավոր սնանկացրել է հաստատությունը՝ հաղորդում է Associated Press-ը:
Ֆրանկո Դեկամինադան մինչև 2011թ. ղեկավարել է Հռոմի IDI մաշկաբանական հիվանդանոցը, որը նրա ղեկավարության ներքո կուտակել է 600 միլիոն եվրոյի պարտք: Բացի քահանյից՝ ձերբակալվել է ևս երկու մարդ: Ոստիկանությունը կալանքի տակ է վերցրել նաև Տոսկանայում գտնվող նրա առանձնատունը, որը Դեկամինադան կառուցել է գողացված գումարով:
2012թ. փետրվարին Հռոմի պապ Բենեդիկտոս 16-րդը լիազորված անձ է նշանակել, որը պետք է փորձեր բարելավել հիվանդանոցի ֆինանսական վիճակը: Սակայն վերջիվերջո Վատիկանը հրաժարվել է հիվանդանոցին տրամադրել ֆինանսական օգնություն, և նախորդ շաբաթ Հռոմի դատարանը IDI-ն սնանկ է ճանաչել:
