Սիրիայի նախագահ Բաշար Ասադի ռեժիմի հակառակորդները գնալով ավելի շատ են ենթարկվում «Ալ-Կաիդայի» հետ կապված ահաբեկիչների ազդեցությանը: Այս մասին այսօր Bild թերթի հետ հարցազրույցում ասել է Գերմանիայի դաշնային հետախուզության ղեկավար Գերհարդ Շինդլերը:
«Սիրիայում բարեհաջող գործում են ահաբեկչական կառույցներ, որոնք առնչվում են «Ալ-Կաիդայի» հետ: Խոսքը մասնավորապես «Ջեբհաթ Ալ-Նուսրա» խմբավորման մի քանի հազար զինյալների մասին է, որոնց դերն Ասադի դեմ զինված դիմակայությունում ավելի ու ավելի նշանակալի է դառնում»,- ասել է նա:
Գերմանական հետախուզության տվյալներով՝ ծայրահեղականները փոքրամասնություն են Ասադի հակառակորդների շարքերում: Ընդհանուր առմամբ՝ ընդդիմությունն առանձնանում է իր ոչ միատարր լինելով՝ խմբավորումները շատ են, դրանք թվաքանակով փոքր են, սակայն ծայրաստիճան մոբիլ:
Շինդլերը կարծում է, որ սիրիական ռեժիմի կողմնակիցներն ապստամբների դեմ պայքարում հաղթանակի շանս չունեն: «Ասադի կառավարությունը զիջում է դիրքերը և վերջին հաշվով պարտություն կկրի»,- ասել է Շինդլերը:
Սիրիայում ծանր վնասվածք է ստացել արաբական երկրներում գերմանական ARD հեռուստաալիքի թղթակից Յորգ Արմբրուստերը: Շաբաթ օրը նկարահանումների ժամանակ նա Հալեպում կրակահերթի տակ է հայտնվել և այժմ գտնվում է Թուրքիայում, բայց շուտով կտեղափոխվի Գերմանիա:
