Ռազմական փորձագետ Դավիթ Ջամալյանի մեկնաբանությամբ՝ Ադրբեջան պետության հիմքերը օր օրի խարխլվում են՝ այդ պետության ներսում առկա էթնիկ հանրույթների տարբերությունների պատճառով: Այսօր լրագրողների հետ հանդիպմանը նա ասաց, որ քաղաքագետ Լևոն Մելիք-Շահնազարյանի դիտարկմամբ՝ Ադրբեջանը լավագույն դեպքում կարելի է համարել պետական կազմավորում, բայց ոչ երբեք պետություն:
«Թալիշների, լեզգիների և մնացած այլ էթնիկ հանրույթների միջև եղած անհաղթահարելի իրողությունների պատճառով անհնարին է Ադրբեջանում ստեղծել դեմոկրատական պետություն՝ մանավանդ, եթե նկատի ունենանք, որ վերջին շրջանում Ադրբեջանը լցվում է քրդերով»:
Բանախոսի խոսքով՝ դա պայմանավորված է Ալիևի կլանի քրդական ծագմամբ, սակայն մյուս կողմից էլ՝ գլուխ են բարձրացրել անդրկովկասյան թուրքերը. «Ադրբեջանի տարածքը ինտենսիվորեն քրդացվում է, ինչը Թուրքիայի հետ տարաձայնությունների պատճառ է դառնում: Թուրքերն ուզում են, որ Բաքվի քրդական կուսակցությունը որակվի որպես ահաբեկչական կառույց, սակայն Ադրբեջանը մերժում է այդ առաջարկները, ավելին՝ քրդերին մեծ տեղ է տալիս»:
Իսկ այն սպառնալիքներին, թե Ադրբեջանը կվերսկսի Արցախյան պատերազմը, Դավիթ Ջամալյանի հավաստմամբ՝ դրանք նավթային շահից բխող խոսքեր են. «Նրանք հիմա միլիոններով ամեն ինչ գնում են, սակայն այդ պաշարները հավերժ չեն, և արդեն իսկ նվազեցման միտումներ են նկատվում»:
