ՄԱԿ-ի գլխավոր քատուղար Պան Գի Մունը թուրք-իսրայելական հարաբերությունների նորմալացումը համարել է տարածաշրջանային կայունությանն ընդառաջ քայլ: Նա ողջունել է երկկողմ հարաբերությունների նորմալացման մասին Թուրքիայի և Իսրայելի որոշումը՝ համարելով այն «կարևոր և տարածաշրջանային կայունության համար հուսադրող ազդանշան»: Այս մասին հայտնում է ITAR-TASS-ը:
Ինչպես փոխանցում է համաշխարհային կազմակերպության մամլո ծառայությունը, Պան Գի Մունն առանձնացրել է այն դերը, որը խաղացել է ԱՄՆ նախագահ Բարաք Օբաման երկու երկրների մերձեցման հարցում, որոնք իրենց դիվանագիտական հարաբերությունները խզել էին 2010-ին Իսրայելի կողմից թուրքական «Մավի Մարմարա» նավի վրա իրականացրած «ռեյդի» հետևանքով:
Հարաբերությունների նորմալացման մասին պայմանավորվածությունը ձեռք է բերվել ուրբաթ, երբ Իսրայելի վարչապետ Բենիամին Նեթանյահուն թուրք գործընկեր Ռեջեփ Թայիփ Էրդողանի հետ հեռախոսազրույցում ներողություն է խնդրել ծովային օպերացիայի ժամանակ թույլ տված սխալների համար:
Իսկ ահա խնդրի վերաբերյալ Իսրայելի նախկին և հնարավոր է՝ ապագա արտգործնախարար Ավիգդոր Լիբերմանը Նեթանյահուի ներողությունն անվանել է «կոպիտ սխալ»: Այս մասին հայտնել է Լիբերմանի «Մեր տունն Իսրայելն է» կուսակցության մամլո ծառայությունը:
Նրա խոսքով՝ այդ քայլն անընդունելի է, քանի որ զենքը իսրայելական կողմը կիրառել է ինքնապաշտպանական նպատակով: Նա երկկողմ հարաբերությունների վատթարացման մեղքը բարդել է Էրդողանի վրա և նշել, որ ներողություն խնդրելը վնաս կհասցնի ազգային արժանապատվությանը և կխարխլի Իսրայելի դիրքերը մերձավորարևելյան տարածաշրջանում և միջազգային ասպարեզում:
