Երեկ Ազատության հրապարակում «Ժառանգության» մամլո խոսնակ Հովսեփ Խուրշուդյանը ներկայացրեց Երևանի ավագանու ընտրություններում կուսակցության միասնական «Բարև, Երևան» կոչվող ցուցակը: Ցուցակում ընդգրկվել է նաև ռեժիսոր, իրավաբան, քաղաքացիական ակտիվիստ Ալեն Սիմոնյանը, ով «Առաջին լրատվական»-ի հետ զրույցում ասաց, որ «Բարև, Երևան» ցուցակում ընդգրկվելը քաղաքականություն մուտք գործելու հայտ է:
Նա նշեց, որ իր քաղաքական գործունեությունը պատկերացնում է ընդդիմադիր դաշտում: «Եթե քաղաքականության մեջ ես, պետք է ձգտես իշխանություն դառնալ, ուստի ձգտելու եմ դառնալ իշխանություն և ի կատար ածել այն ամենն, ինչ մտածում եմ»,- նկատեց Ալեն Սիմոնյանը: Վերջինս որևէ կուսակցությանն անդամագրվելու առաջարկ չի ստացել: Ըստ նրա՝ օրակարգում նման հարց չկա, ավելին՝ այսօր ներկապնակում չի տեսնում այնպիսի կուսակցություն, որին կցանկանար անդամակցել: Մեկ բան հաստատ է նրա համար՝ երբևէ իշխանական որևէ կուսակցության շարքերում չի հայտնվի:
Պատասխանելով այն հարցին, թե չի՞ կարծում, որ ճիշտ չի հասկացվի, որ մի ժամանակ մասնակցում էր ՀԱԿ հանրահավաքներին, իսկ հիմա՝ «Ժառանգության», մեր զրուցակիցն ասաց, որ երբևէ ո՛չ «Ժառանգության» կողքին է եղել, ո՛չ էլ՝ ՀԱԿ-ի:
«Ես քվեարկել եմ հօգուտ ՀԱԿ-ի, դրանից առաջ քվեարկել եմ հօգուտ ՀՀ առաջին նախագահ Լևոն Տեր-Պետրոսյանի և դուրս եմ եկել հրապարակ տեր կանգնելու իմ ձայնին: Պետք չէ անհատականացնել: Եթե տեր ես քո ձայնին, չի նշանակում, որ որևէ կուսակցության անդամ ես: Հիմա ես փորձում եմ տեր կանգնել այն ձայներին, որոնք որ հայ ժողովրդից խլվել են, և դրա համար այսօր հրապարակում եմ: Ավելին ասեմ՝ վաղը, երբ Սերժ Սարգսյանից որևէ մեկը ձայներ խլի, ես կկանգնեմ հրապարակում: Դիրքորոշումս հետևյալն է՝ ՀՀ քաղաքացին ունի ընտրության իրավունք: Ես ուղղակի քաղաքացի եմ, ով տեր է կանգնում իր ձայնին, ինձ պետք չէ մեկ բևեռից մյուսը գցել»,- մեկնաբանեց Ալեն Սիմոնյանը:
Անդրադառնալով մայիսի հինգին կայանալիք Երևանի ավագանու ընտրություններին՝ նա տեսակետ հայտնեց, որ դրանք քաղաքական ընտրություններ են, այսինքն՝ ունեն քաղաքական պատվեր, և պայքարը գնալու է ազդեցության ոլորտ ձեռք բերելու և իշխանություններին ազդեցության ոլորտից զրկելու համար, որովհետև սկսած ամենափոքր օղակներից՝ որոշում կայացնողներն իշխանություններն են: Ուստի, Ալեն Սիմոնյանի համոզմամբ, գալիք ընտրություններն առաջին հերթին քաղաքական պայքարի հանգրվան են, հետո՝ քաղաքի խնդիրներին լուծմանն ուղղված միջոցառում: Թեև նա քաղաքում շատ խնդիրներ է տեսնում։
«Այսօրվա վիճակի վերաբերյալ շատ ծիծաղելի փաստեր կարող եմ մատնանշել՝ սկսած նրանից, որ Հայաստանի մայրաքաղաքում կեսգիշերից հետո լույսն անջատում են, վերջացրած նրանով, որ գումարներ են դուրս գրվում պլաստմասե ձիուկների և անորակ նստարանների համար»,- ասաց Ալեն Սիմոնյանը և հավելեց, որ Երևանի կենտրոնում է ծնվել, մեծացել, ուստի Երևան քաղաքը շատ լավ է ճանաչում, իսկ ավագանու կազմում կարող է հանրօգուտ աշխատանքով զբաղվել:
