Ադրբեջանական Day.az կայքի փոխանցմամբ, անվտանգության հարցերով վրաց փորձագետ Իրակլի Սեսիաշվիլին GHN լրատվական գործակալությանը տված հարցազրույցի ժամանակ անդրադարձ է կատարել Վրաստանի պաշտպանության նախարարի հայաստանյան այցին և հայ-վրացական հնարավոր ռազմական համագործակցության խնդիրներին.
«Վրաստանը չպետք է ռազմական ոլորտում համագործակցի Հայաստանի հետ, քանի որ դա բարդեցումներ կառաջացնի Հարավ-կովկասյան տարածաշրջանում:
Վերջերս հայկական լրատվամիջոցները տեղեկատվություն տարածեցին, թե Հայաստանի պաշտպանության նախարարն ընդունել է Հայաստանում Վրաստանի դեսպանին, և որ հանդիպման ժամանակ նշվել է, որ Հայաստանը ցանկանում է ռազմական ոլորտում համագործակցել Վրաստանի հետ:
Երևանը մտավախություն ունի, որ Ադրբեջանի հետ հակամարտությունը կարող է սրվել: Դրա համար էլ նա փորձում է գտնել այլընտրանքային ուղիներ թե´ զենքի առաքումների, թե´ այլ ռեսուրսների մոբիլիզացման հարցերում:
Բնականաբար, միակ տարանցիկ երթուղին անցնում է Վրաստանի տարածքով: Դրա համար գոյություն ունի օդային ճանապարհ, սակայն դա շատ թանկարժեք ճանապարհ է, ինչի համար էլ Հայաստանն իր նախապատվությունը տալիս է Վրաստանի հետ համագործակցությանը:
Մենք պետք է վերլուծության ենթարկենք այն ռիսկերը, որոնք կարող են առաջանալ այդ գործընկերությունից: Դա, մասնավորապես, վերաբերում է վրաց-ադրբեջանական ռազմավարական գործընկերությանը:
Մենք Ադրբեջանի հետ համագործակցում ենք տարբեր ուղղություններով և Հայաստանի հետ Վրաստանի ռազմական համագործակցությունը կառաջացնի Բաքվի զայրույթը: Հայաստանի հետ Վրաստանի ռազմական համագործակցությունը կարող վերջինիս համար աղետալի հետևանքներ ունենալ:
Դա անցանկալի իրավիճակ կառաջացնի տարածաշրջանում, կտուժեն մեր բարեդրացիական հարևանական հարաբերությունները: Չպետք է ընդգծված կերպ ընտրություն կատարել միմյանց հետ հակամարտության մեջ գտնվող Հայաստանի ու Ադրբեջանի միջև, քանի որ դա կհարուցի մյուս կողմի զայրույթը:
Միևնույն ժամանակ Սաակաշվիլին պետք է գիտակցի, որ Հայաստանի անվտանգությունն ապահովում է Ռուսաստանը և հարևան երկրում գտնվող ռազմաբազաներն ուղղակի սպառնալիք են ներկայացնում Վրաստանի համար»:
Հիշեցնենք, որ ներկայումս Ռուսաստանի հետ բավականին բարդ հարաբերությունների մեջ գտնվող Վրաստանն էներգետիկ մատակարարման հարցում խիստ կախվածության մեջ է գտնվում Ադրբեջանից: Խոսքը, մասնավորապես, վերաբերում է «Բաքու-Թբիլիսի-Ջեյհան» (ԲԹՋ) և «Բաքու-Սուփսա» նավթամուղերին, ինչպես նաև «Բաքու-Թբիլիսի-Էրզրում» (ԲԹԷ) գազատարին: Մյուս կողմից էլ, սակայն, Ադրբեջանը էներգակիրների տարանցման ոլորտում ուժգին կախում ունի Վրաստանից: