Google ընկերությունը թողարկման է պատրաստում Google Play-ի չորրորդ տարբերակը: Առցանց խանութի միջոցով Android սարքերից օգտվողները մուտք են ստանում դեպի ծրագրերի, գրքերի, ֆիլմերի և երաժշտության կատալոգ: Ծրագրում նախատեսված չէ որևէ նոր գործառույթ: Նորարարությունները վերաբերում են միայն դիզայնին: Այս մասին հայտնում է Vesti-ն:
Առաջին հերթին ընկերությունը որոշել է հրաժարվել բավականին մռայլ՝ մուգ մոխրագույն և կանաչ դիզայնից և բեռնաթափել ինտերֆեյսը ավելորդ ինֆորմացիայից:
Այսուհետ յուրաքանչյուր բաժին կունենա իր գույնը, օրինակ՝ գրքերի բաժինը կլինի կապույտ, իսկ երաժշտությանը՝ նարնջագույն: Էջերը կդառնան ավելի տարողունակ:
Google Play 4.0-ի նոր դիզայնում որոշակի նմանություն կա Google Now անձնական օգնականի հետ: Սպասվում է, որ ընկերությունը կատարելագործված Google Play-ը կներկայացնի I/O կոնֆերանսի ժամանակ, որը տեղի կունենա մայիսի 15-17-ը՝ Սան Ֆրանցիսկոյում: Այդ ժամանակ սպասվում է նաև Android 5.0 (Key Lime Pie) օպերացիոն համակարգի, ինչպես նաև Motorola X սմարթֆոնի ներկայացումը:
