ՆԱՏՕ-ն չի պատրաստվում ռազմական միջամտություն իրականացնել Սիրիայում՝ դաշինքի դիրքորոշումն այս հարցում անփոփոխ է: Ինչպես հաղորդում է Interfax-ը, այս մասին հայտարարել է Եվրոպայում ՆԱՏՕ-ի ուժերի միացյալ հրամանատարության շտաբի ներկայացուցիչ գնդապետ Մարտին Դաունին:
«ՆԱՏՕ-ի դիրքորոշումը Սիրիայի հանդեպ չի փոխվել: ՆԱՏՕ-ն` որպես դաշինք, Սիրիա ներխուժելու ծրագրեր չի ունեցել»,- ասել է նա:
Գնդապետի խոսքով`ՆԱՏՕ-ի գործողությունները, ի պատասխան այս ճգնաժամի, կրում են բացառապես պաշտպանական բնույթ, ինչի ապացույցն է Patriot համալիրների տեղակայումը Թուրքիայի տարածքում:
Ավելի վաղ ԵՄ-ում Ռուսաստանի մշտական ներկայացուցիչ Վլադիմիր Չիժովը հայտարարել էր, որ ՆԱՏՕ-ի կողմից Սիրիայում լիբիական սցենարի կրկնությունը կդառնար խոշոր ռազմավարական սխալ: Այս կերպ նա մեկնաբանել է Եվրոայում ԱՄՆ զինված ուժերի հրամանատար, ծովակալ Ջեյմս Սթավրիդիսի հայտարարությունն այն մասին, որ ՆԱՏՕ-ն ռազմական գործողությունների ծրագիր է նախապատրաստում Սիրիայում քաղաքացիական պատերազմին վերջ դնելու համար:
Դաունի խոսքերով` որևէ գործողություն ծավալելու որոշ երկրների մտադրությունները տարբերվում են ՆԱՏՕ-ի դիրքորոշումից:
