Էկոնոմիկայի նախարար Տիգրան Դավթյանը «Առաջին լրատվական»-ի հետ զրույցում հայտնեց, որ ֆրանսիական հայտնի «Կառֆուր» հիպերմարկետների ցանցի ներկայացուցիչները իրենց հետ հանդիպելուց հետո գնացել են Հայաստանից: «Առաջիկայում կվերադառնան, և կշարունակենք աշխատանքը»,- ասաց նախարարը:
Տ. Դավթյանի խոսքով՝ ինքը «Կառֆուր» ընկերության ներկայացուցիչների հետ քննարկել է գործունեության ձևաչափին, տարածքին և այլ տեխնիկական խնդիրներին առնչվող հարցեր:
Հիշեցնենք, որ «Կառֆուրը» նախապես հուշագիր էր ստորագրել «Դալմա Գարդեն Մոլի» հետ՝ իր հայաստանյան մասնաճյուղն այդ ընկերության առաջին հարկում տեղակայելու համար: Սակայն ամիսներ առաջ հայտնի դարձավ, որ «Դալմա Գարդեն Մոլը» հրաժարվել է «Կառֆուրին» տարածք տրամադրել: Հրապարակումներ եղան, որ «Կառֆուրի» մուտքը Հայաստան առայժմ կասեցրել են Հայաստանի խոշոր ներկրողներն ու իրացնողները, մասնավորապես՝ լայն սպառման ապրանքների ներկրման ոլորտում մեծ տեղ զբաղեցնող և սուպերմարկետների հսկայական ցանց ունեցող Սամվել Ալեքսանյանը, ՊԵԿ նախագահ Գագիկ Խաչատրյանը, ինչպես նաև պատգամավոր և ՍԱՍ սուպերմարկետների ցանցի սեփականատեր Արտակ Սարգսյանը: Խոչընդոտելու պատճառն այն է, որ «Կառֆուրն» ինքն էր ներկրելու իր հիպերմարկետում վաճառվող ապրանքը, և դա լուրջ մրցակցություն կստեղծեր մեր երկրի ներկրման ու իրացման շուկայում: Դա էլ իր հերթին կխոչընդոտեր վերը նշված օլիգարխների՝ գերշահույթ ստանալու մղումներին:
Մեր երկրում «Կառֆուրի» խնդիրն առայժմ իր պահանջներին համապատասխան տարածք ունենալն է, որը դեռևս չի գտնվում: Իսկ իշխանական կուլիսներում շրջանառվում է, որ վերը նշված օլիգարխները կարողացել են նախագահ Սերժ Սարգսյանի մակարդակով այս տարի կասեցնել «Կառֆուրի» մուտքը:
Արդյոք ճի՞շտ են տեղեկությունները, որ այդ օլիգարխները նախագահին խնդրել են «Կառֆուրի» մուտքը մեկ տարով հետաձգել՝ մինչև իրենք նախորդ խորհրդարանական և այս նախագահական ընտրություններին ծախսած գումարը ետ բերեն՝ հարցին Տիգրան Դավթյանը պատասխանեց. «Նման բան չկա»:
