ԵԺԿ գագաթնաժողովին մասնակցելու համար Բրյուսել մեկնած Սերժ Սարգսյանը ԵԺԿ նախագահ Վիլֆրեդ Մարթենսի հետ հանդիպմանը նրան և ԵԺԿ ընտանիքին շնորհակալություն է հայտնել նախագահական ընտրությունների ընթացքում իրեն ցուցաբերած ջերմ աջակցության և հետընտրական շրջանում շնորհավորանքների համար:
2008 թվականի նախագահական ընտրություններից հետո Սերժ Սարգսյանը Մոսկվայում ՌԴ նախագահ Վլադիմիր Պուտինին էր շնորհակալություն հայտնում ընտրություններում ցուցաբերած աջակցության համար: Հինգ տարի հետո Սերժ Սարգսյանը Մոսկվայում Պուտինի հետ հանդիպմանը աջակցության համար նրան շնորհակալություն չհայտնեց, փոխարենը մեկ օր հետո մեկնելով Բրյուսել՝ շնորհակալություն հայտնեց Մարթենսին և ԵԺԿ-ի ընտանիքին:
Սովորաբար, որևէ ընտրված նախագահ իր հաղթանակի համար շնորհակալություն է հայտնում ոչ թե այս կամ այն երկրի կամ կառույցի նախագահներին, այլ սեփական ժողովրդին, ընտրողներին, որովհետև ընտրություններում ընտրողների աջակցությունն է հաղթանակ բերում: Սակայն պարզ է նաև, որ Սերժ Սարգսյանն այդ ընտրողները չունի, որ նրանց աջակցության համար շնորհակալություն հայտնի: Հետևաբար մնում է շնորհակալություն հայտնել այս կամ այն գերտերությանը կամ գերկառույցին: Իսկ թե հատկապես ում՝ դա էլ, ըստ երևույթին, պայմանավորված է աշխարհաքաղաքական և ներքաղաքական իրավիճակով: Եվ ըստ այդմ, կարելի է հետևություններ անել Սերժ Սարգսյանի շնորհակալություններով:
2008 թվականի մարտի 1-ից հետո նա աջակցության համար շնորհակալություն էր հայտնում Պուտինին, իսկ այսօր շնորհակալություն է հայտնում ԵԺԿ-ին: Նախընտրական արշավի մեկնարկային հանդիպումներում Սերժ Սարգսյանը Դավիթաշենում հայտարարեց, որ այսօր սկուտեղի վրա մատուցվել է լավագույն ընտրություններ անցկացնելու հնարավորությունը, որը բաց թողնելու իրավունք չունենք: Ըստ երևույթին, սկուտեղը մատուցողը Եվրոպան էր, ԵԺԿ-ն կամ անձնապես Մարթենսը, որին էլ այսօր աջակցության համար շնորհակալություն է հայտնում Սերժ Սարգսյանը:
Սերժ Սարգսյանի գլխավոր հենարանը ներքաղաքական իրավիճակում կարծես թե դառնում է Եվրոպան, կամ միգուցե ավելի ճիշտ կլինի ասել, որ Ռուսաստանում Սարգսյանը չի ստացել անհրաժեշտ աջակցություն ներքաղաքական իրավիճակը պահելու մասով, և մոսկովյան այցը, չլինելով վտանգների իմաստով ճակատագրական, չի եղել նաև երաշխիքային, ինչից հետո Սերժ Սարգսյանը փորձում է երաշխիքներ ստանալ Եվրոպայում: Եվ դատելով «Ժառանգություն» կուսակցության քարտուղար Ստեփան Սաֆարյանի նամակին Վիլֆրեդ Մարթենսի պատասխանից, որտեղ նա կոչ էր անում ԵԺԿ-ին հետ վերցնել Սերժ Սարգսյանին ուղղված շնորհավորանքը՝ հակառակ դեպքում զգուշացնելով, որ «Ժառանգությունը» կդադարեցնի անդամակցությունը ԵԺԿ-ին, Եվրոպան պատրաստ է Սերժ Սարգսյանին որոշակի երաշխիքներ տրամադրել: Մարթենսը իր զարմանքն էր հայտնել «Ժառանգության» դժգոհությունների կապակցությամբ: Ամենայն հավանականությամբ, դա այն վարձն է, որ Սերժ Սարգսյանը Բրյուսելում ստանում է Մոսկվայում Մաքսային և Եվրասիական միությունների հարցերով համաձայնություններ չտալու դիմաց:
Մյուս կողմից, սակայն, Եվրոպային էլ երևի թե արժեր վստահ չլինել այդ հարցում, քանի որ Սարգսյանի մոսկովյան այցը, չնայած իր նախնական հնչեղությանը, շատ խորհրդավոր ստացվեց, և երևի այդ այցի ձայնը ավելի ուշ կլսվի:
