Տարբեր ժամանակահատվածներում ընտրություններին հաղթել են ընդդիմադիր քաղաքական գործիչները, սակայն երբ պաշտոնական արդյունքներն այլ են եղել՝ դուրս են եկել փողոց և ընդդիմադիր շարժում կազմավորել: Ամեն դեպքում՝ այդ ամենի արդյունքում երդմնակալել է պաշտոնական տվյալներով վերընտրված նախագահը: Րաֆֆի Հովհաննիսյանի դեպքն էլ է նույն ավարտն ունենալու: Այսօր հրավիրված մամլո ասուլիսի ընթացքում նման կարծիք հայտնեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը:
«1996 թվականին Վազգեն Մանուկյանն էր հաղթել, հետո՝ Կարեն Դեմիրճյանը, այնուհետև՝ Ստեփան Դեմիրճյանը, և բնական է, որ նրանք չընդունելով արդյունքները՝ պետք է ընդդիմանային պաշտոնական տվյալներին, բայց Րաֆֆի Հովհաննիսյանի պարագայում խնդիրը մի փոքր այլ է: Նրա այդ 500.000 ձայներն իրենը չեն, դրանք հակասերժական ձայներ են, մարդիկ չեն քվեարկել Րաֆֆի Հովհաննիսյան թեկնածուի օգտին: Իսկ, օրինակ, 2008-ին թեկուզ հենց պաշտոնական 21 տոկոսը Լևոն Տեր-Պետրոսյանի ձայներն էին»:
Քաղաքագետի դիտարկմամբ՝ սա է պատճառը, որ Րաֆֆի Հովհաննիսյանն այսօր դժվար կացության մեջ է և ծայրահեղ քայլի է դիմել. «Նրա համար բավական դժվար է համախմբել այդ մարդկանց, դա իր ընտրազանգվածը չէ, իսկ արդյունքը լինելու է ապրիլի 9-ին Սերժ Սարգսյանի երդմնակալությունը»:
