Վրաստանի ու Հայաստանի ամենակարևոր հետաքրքրությունը տարածաշրջանային կայունությունն ու խաղաղությունն է: «Առաջին լրատվական»-ի հետ զրույցում այս մասին ասաց վրաստանցի փորձագետ Տորնիկե Շարաշենիձեն՝ խոսելով հայ-վրացական հարաբերությունների ներկայիս փուլի շուրջ:
Շարաշենիձեն նկատեց, որ Հայաստանը տարածաշրջանում խնդիր ունի Ադրբեջանի հետ, ուստի ունի հարևան երկրների հետ գործընկերության կարիք: Բացի ՌԴ-ից՝ անհրաժեշտ է նաև տարբեր ոլորտներում Վրաստանի հետ համագործակցել: Քաղաքագետը նաև նշեց, որ Վրաստանին ևս անհրաժեշտ է գործընկերային հարաբերություններ հաստատել իր հարևանների, այդ թվում՝ Հայաստանի հետ, քանի որ կան խնդիրներ ՌԴ-ի հետ:
«Բացի այդ, Հայաստանն ու Վրաստանն ընդհանուր հետաքրքրություններ ունեն տարածաշրջանում: Կողմերը հետաքրքրված են, որ տարածաշրջանում պահպանվի և ամրապնդվի խաղաղությունը, հավասարակշռությունը: Վրաստանն ու Հայաստանը նաև միջազգային կապեր ունեն: Այս ամենը հաշվի առնելով՝ կարող ենք ասել, որ Հայաստանն ու Վրաստանը լավ գործընկերներ են և կարող են ապագայում ևս լինել»,- ասաց քաղաքագետը՝ հավելելով, որ համագործակցություն կարող է լինել նաև մի շարք ոլորտներում:
Նրա կարծիքով՝ առևտրի ոլորտում առկա համագործակցությունը կարող է շարունակվել, անվտանգության ոլորտում Հայաստանը չունի Վրաստանի հետ համագործակցելու կարիք, քանի որ այս ոլորտում Հայաստանում ՌԴ-ն է:
«Երկու երկրներն էլ հետաքրքրված են տարածաշրջանի խաղաղությամբ. դա ամենամեծ հետաքրքրությունն է»,- եզրափակեց իր խոսքը Տորնիկե Շարաշենիձեն:
Հիշեցնենք, որ օրեր առաջ պաշտոնական այցով Հայաստանում էր Վրաստանի պաշտպանության նախարար Իրակլի Ալասանիան, ով իր հայաստանյան գործընկերոջ հետ քննարկել է երկրների անվտանգությանն առնչվող մի շարք հարցեր: Նա ընդգծել էր, որ ՀՀ-ում ռուսական ռազմաբազաները Վրաստանի համար վտանգ չեն ներկայացնում, քանի որ Հայաստանն ու Վրաստանը գործընկեր պետություններ են:
Երեկ պաշտոնական այցով ՌԴ-ում էր ՀՀ նախագահ Սերժ Սարգսյանը: Վերջինս հանդիպել էր ՌԴ նախագահ Վլադիմիր Պուտինի հետ: Սերժ Սարգսյանն ընդգծել էր, որ բարձր է գնահատում երկրների միջև ռազմական համագործակցության ոլորտում առաջընթացը:
