Google-ը գործարկել է «Օգնություն կոտրված կայքերի համար» տեղեկատվական կայքը (Help for hacked sites): Ընկերությունում հայտնել են, որ նոր ռեսուրսի նպատակն է տեխնիկական պատրաստվածության ցանկացած մակարդակով կայքերի տերերին օգնել՝ հասկանալու, թե ինչպես կարող են նրանք պաշտպանել իրենց կայքերը հաքերային հարձակումներից կամ հարձակումների դեպքում ինչպես վերականգնել կայքերի աշխատանքը: Այս մասին հայտնում է Vesti-ն:
Այժմ կայքում կան տասնյակ հոդվածներ ու 80-ից ավելի տեսագրություններ: Ընկերությունում ընդգծում են, որ տեղեկությունը հասանելի է համակարգչային պատրաստվածության ցանկացած մակարդակով մարդկանց համար: Դա հատկապես կարևոր է՝ հաշվի առնելով այն, որ անվտանգության ապահովման ցանկացած գործողություն պահանջում է համակարգի ադմինիստրատորների առկայություն:
Հիշեցնենք, որ վերջին շրջանում մի շարք հաքերային հարձակումներ են իրականացվել առաջատար ընկերությունների կայքերի վրա: Հարձակման ենթարկվածների թվում են Twitter-ը, Facebook-ը, The New York Times-ի, The Washington Post-ի ու The Wall Street Journal-ի կայքերը: